Ein søknad kan vere motteken og registrert hos kommunen før den aktive saksbehandlinga startar.

Når det kjem inn meir arbeid enn byggesak har kapasitet til å behandle, oppstår det kø. Det kan føre til at enkelte saker må vente før dei blir tekne opp til aktiv behandling.

Som hovudregel behandlar vi sakene i den rekkefølgja dei kjem inn. Det kan likevel vere grunnar til at enkelte saker blir tekne opp før andre, til dømes ulike fristar, behov for avklaringar eller andre prioriteringar.
 

Ei byggesak er meir enn å lese søknaden og skrive eit vedtak. Dokumentasjonen skal kontrollerast, og tiltaket skal vurderast mot plan, lovverk og andre krav. Nokre saker krev også dispensasjon, høyring eller andre faglege avklaringar.

Det som utanfrå kan sjå ut som ei enkel sak, kan derfor krevje fleire dagsverk med arbeid. Storleiken på tiltaket seier ikkje alltid kor krevjande saka er. Også eit mindre tiltak kan utløyse fleire faglege og juridiske avklaringar.

Sjølv når saka er teken opp til behandling, kan ho derfor strekkje seg over tid. Det kan vere behov for ettersending av dokumentasjon, høyring eller avklaringar med andre fag eller styresmakter før kommunen kan gå vidare.
 

Ein komplett og godt dokumentert søknad gjer det enklare å behandle saka utan unødvendige stopp.

Dersom opplysningar eller dokumentasjon manglar, må kommunen be om det som manglar før saka kan behandlast vidare. Saka må deretter takast opp att når dokumentasjonen er komen inn.
 

Vi oppdaterer denne sida jamleg med generell informasjon om byggesakskøen.

Dersom saka di ikkje har særlege forhold som krev eiga avklaring, vil du normalt finne den mest oppdaterte informasjonen om ventetida øvst på denne sida.