NORDDAL KOMMUNE

Arkiv: U00

Saksmappe: 04/00945-26

Møtebok

Klage frå Fjellro Turisthotell AS på næringsfonds vedtak

Saksnr. utval	Utval	Møtedato
007/06	Formannskapet	06.02.06
007/06	Kommunestyret	16.02.06

Utsendte saksdokument:

Søknad frå Fjellro Turisthotell AS datert 31.10.05.

Klage frå Fjellro Turisthotell AS datert 02.01.06.

Saksgrunnlag:

Det har kome inn ei klage på vedtak gjort i den tredje fordelinga av næringsfondsaker. Klaga er innkomen i rett tid. Ei klage på vedtak i næringsfondsaker sak først til formannskapet, som er fondsstyre. Dersom formannskapet opprettheld vedtaket og ikkje tek klaga heilt eller delvis til fylgje, skal saka vidare til kommunestyret.

I den tredje næringsfondsrunden vart det fordelt totalt kr 385.000 av tilgjengelege midlar på kr 315.652. Av desse var kr 35.000 frå næringsfondet og kr 280.652 frå tidlegare tildelte midlar som no vart trekt inn igjen i fondet. Dette betyr vidare at ein har fordelt kr 69.348 for mykje i 2005 av tilgjengelige midlar. Rentemidlar er ikkje tatt med her.

Saksopplysningar:

Dette er ei klage på avslaget til marknadsføringstilskot til bedrifta Fjellro Turisthotell AS. Bedrifta driv med overnatting og matservering. Bedrifta søkte om til saman kr 175.000 i støtte til ulike tiltak knytt til marknadsføring; design og oppretting av heimeside, brosjyrar og annonsering.

I 2003 fekk bedrifta innvilga tilskot til webutvikling og brosjyrar, på til saman kr 17.500. Då saksutgreiinga til den tredje fordelingsrunden foregjekk hadde ikkje Fjellro henta ut desse midlane. Som ein kommentar til kostnadsoverslaget i søknaden stod det at ”heimesida er alt oppretta.” Ein vurderte det som uaktuelt å på nytt gje støtte til ein søknad om same tiltak som søkjar allereie hadde fått innvilga støtte til tidlegare, og ikkje henta ut.

Ein betalingsoppmoding på kr 17.500 kom rett før saka skulle sendast ut til formannskapet. Fjellro søkte då om utbetaling av tilskotet, med grunnlag i dei totale marknadsføringskostnadane bedrifta har hatt dei siste tre åra. Dette var eit samla beløp på kr. 178.166. Som drivarane sjølve skreiv vart ikkje tiltaka webside og brosjyre gjennomført i denne perioden, ein hadde endra planane og satsa på marknadsføring innan ”Mitt Hotell” og andre kanalar. Ein søkte likevel om utbetaling av tilskotet.

Etter samtale med Norddal Rekneskapskontor, som fører rekneskapen for bedrifta, kom det fram at den heimesida dei no søkjer støtte til allereie er i drift. På bakgrunn av denne informasjonen og konkrete fakturaer knytt til kostnadane til blant anna heimesida vart tilskotet på kr 17.500 utbetalt. Administrasjonen ynskte å knytte tilskotet til tiltak det var meint å skulle bidra til å utvikle.

Saksvurdering og konklusjon:

Det er ikkje meininga at næringsfondet skal heile tida støtte alle bedrifter som ser at dei må iverksetje tiltak for å drive bedrifta si. I klaga står det at dei meiner det er ”underleg at næringsfondet støttar godt opp under nyetablering av bedrifter, medan vi som også treng hjelp og støtte for å overleve og utvikle oss, får avslag.” I retningslinjene for næringsfondet står det at tiltak som er retta mot omstilling, ekspansjon og nyskaping skal prioriterast. Ein kan ikkje sjå at Fjellro sine marknadsføringstiltak i stor grad er innan nokon av desse tre hovudelementa.

Ein minner òg om at kommunen i 1998 har støtta bedrifta gjennom ei gjeldssanering på kr 678.437.

Vidare kan ein nemne at konkurranse er bra for næringslivet, det fører til kreativitet for å overleve. Det er viktig at ein har overnattingsplassar i kommunen som er eigna til bruk også utanom den hektiske sommarsesongen. Det er svært positivt at Fjellro ynskjer å utnytte hotelldelen av drifta mykje betre. Administrasjonen ynskjer å oppmuntre bedriftene i kommunen til å samarbeide slik at ein kan verte ein kommune med heilårsturisme, og her kan Fjellro spele ei stor rolle.

Ein kan ikkje sjå at det har kome inn nye opplystingar eller moment i saka, og ein kjem til at klaga ikkje bør takast til fylgje.

Stig Holmstrøm
rådmann