NORDDAL KOMMUNE

Arkiv: 52/1

Saksmappe: 04/00887-24

Sakshandsamar: Lars Kjell Smoge

Møtebok

Klagesak - Norddal prestegard, gnr. 52, bnr. 1

Saksnr. utval	Utval	Møtedato
002/06	Det faste utvalet for plansaker	06.02.06
015/06	Det faste utvalet for plansaker	13.03.06

Utsendte saksdokument:

Brev dagsett 23.11.05 Fylkesmannen i Møre og Romsdal

Brev av 24.10.05 frå Fylkesmannen i Møre og Romsdal

Ikkje utsendte saksdokument:

Sak 079/05, møte 28.11.05, Det faste utvalet for plansaker

Sak 034/05, møte 30.05.05 i Det faste utvalet for plansaker

Førebels melding dat. 13.09.05 frå Fylkesmannen

Oversending av klage til Fylkesmannen, brev dat. 05.09.05

Førebels melding dat. 14.07.05 frå Fylkesmannen

Oversending av klage til Fylkesmannen, brev dat. 06.07.05

Vårt brev av 24.06.05 til Opplysningsvesenets fond

Sak 34/05, møte 30.05.05, Det faste utvalet for plansaker

Annonsetekst – Bygge- og deleforbod

Klage på vedtak dat. 25.04.05 m/vedlegg frå Opplysningsvesenets fond

Brev til Opplysningsvesenets fond dat. 04.04.05

Sak 18/05, møte 14.03.05, Det faste utvalet for plansaker

Gjeldande kommuneplan, arealdelen, for 2002-2013

Gjeldande arealbruksbestemmelsar til arealdelen av kommuneplanen

Søknad av 03.12.04 m/vedlegg om deling av Norddal Prestegard frå Opplysningsvesenets fond

Vårt brev dagsett 23.12.04 til Opplysningsvesenets fond

Søknad frå Opplysningsvesenets fond datert 19.01.05 om dispensasjon

Handsaming i Det faste utvalet for plansaker 13.03.06:

Merete Løvoll Rønneberg kom med slikt forslag til vedtak:

1. Det faste utvalet for plansaker viser til Fylkesmannen si avgjerd i brev dagsett 23.11.05,

der kommunen sitt vedtak om byggje- og deleforbod i sak 34/05 vart stadfesta.

2. Det faste utvalet for plansaker ynskjer å bevare prestegarden som ei sjølvstendig driftseining, for såleis vere med og gje grunnlag for busetjing og næringsutvikling i bygda Norddal.

Ein har registrert at det i dag er stor etterspørsel etter ”småbruk”, og ser potensiale for prestegarden i ein slik samanheng. Ein er oppteken av å bidra til busetjing og befolkningsauke i alle bygder i kommunen. Planutvalet vurderer det til at tradisjonelt landbruk med t.d. mjølkeproduksjon, pr. i dag synest lite realistisk på bruket, men meiner at det knytt til prestegarden er så store ressursar og gode rettigheiter, at alternative driftsformer innanfor landbruk, vil vere fullt mogleg.

Det faktum at driftsbygning og paktarbustad vart selt til Norddal kommune i 1997, meiner planutvalet har lita betydning i denne samanheng. Driftsbygninga var alt då så forelda at ho med dagens krav til landbruksbygningar, uansett ville vere ueigna for dei fleste driftsformer/nisjer innanfor næringa.

Også i lys av nyare signal om auka satsing på geoturisme i verdsarvområdet, som dels ligg i kommunen, og det bygdeutviklingsarbeidet som har vore gjort i Norddalsbygda spesielt, ser ein definitivt potensiale for prestegarden som sjølvstendig bruk i framtida.

Planutvalet vil understreke at ein ser det som svært uheldig om eit gardsbruk med så store ressursar, og som er ein så sentral tradisjonsberar for bygdene våre, skulle bli ytterlegare splitta opp, og kanskje selt ”stykkevis og delt”.

3. Arbeidet med regulering av området Norddal Prestegard, gnr 52, bnr 1, med formål landbruk, vert å starte snarast.

Vedtak samrøystes i samsvar med forslaget frå Merete Løvoll Rønneberg.

Vedtak i Det faste utvalet for plansaker - 13.03.06:

1. Det faste utvalet for plansaker viser til Fylkesmannen si avgjerd i brev dagsett 23.11.05,

der kommunen sitt vedtak om byggje- og deleforbod i sak 34/05 vart stadfesta.

2. Det faste utvalet for plansaker ynskjer å bevare prestegarden som ei sjølvstendig driftseining, for såleis vere med og gje grunnlag for busetjing og næringsutvikling i bygda Norddal.

3. Arbeidet med regulering av området Norddal Prestegard, gnr 52, bnr 1, med formål landbruk, vert å starte snarast.

Saksgrunnlag:

I møte 28.11.05, sak 079/05 i Det faste utvalet for plansaker, vart det gjort slikt samrøystes vedtak:

Saka vert utsett for å samordne med brev frå fylkesmannen av 23.11.05.

I sak 034/05 i møte 30.05.05 gjorde Det faste utvalet for plansaker slikt samrøystes vedtak:

Det faste utvalet for plansaker held fast på prinsippet i sitt vedtak i sak 18/05 og vedtek i medhald av § 33 i PBL bygge- og deleforbud for Norddal Prestegard, gnr. 52, bnr. 1, for område avsett til serviceformål i arealdelen i kommuneplanen, og fremme reguleringsplan med formål landbruk.

Klaga dat. 25.04.05 frå Opplysningsvesenets fond om dispensasjon vert såleis ikkje å ta til følgje.

Med vedtaket i sak 034/05 som grunnlag vart saka med sine dokument oversendt Fylkesmannen for handsaming, oversendingsbrev dagsett 06.07.05.

Brev frå Fylkesmannen dagsett 24.10.05 med handsaming av klagesaka ligg føre; jfr. vedlegg.

Likeså vart som grunnlag i vedtaket i sak 052/05 saka med sine dokument oversendt Fylkesmannen for handsaming, oversendingsbrev dagsett 05.09.05.

No ligg føre brev frå Fylkesmannen dat. 23.11.05 med handsaming av den andre klagesaka; jfr. vedlegg.

Saksopplysningar:

I brevet frå Fylkesmannen av 23.11.05 går det fram at det er gjort slikt vedtak:

Med heimel i plan- og bygningslova § 15, jf. forvaltningslova § 34 og Fellesrundskriv T-8/86 frå Kommunaldepartementet og Miljøverndepartementet, stadfestar fylkesmannen Norddal kommunes vedtak i sak nr 34/05.

Dette vedtaket er endeleg og kan ikkje påklagast vidare, jf. forvaltningslova § 28.

Fylkesmannen skriv vidare i brevet (23.11.05) under merknader:

Det faste planutvalet kan med heimel i pbl § 33 gjere vedtak om at visse bygge- og frådelingstiltak ikkje kan setjast i verk før reguleringsspørsmålet er endeleg avgjort. Bygge- og deleforbodet fell vekk etter 2 år dersom reguleringsspørsmålet ikkje er endeleg avgjort, jf pbl § 33, 4. ledd. Føresetnaden for å legge ned bygge- og deleforbod er at kommunen arbeider aktivt og kontinuerleg med reguleringsarbeidet og at arealbrukssituasjonen vert avklara snarast råd. Det er høve til å søke om dispensasjon frå bygge- og deleforbodet.

Formålet med reguleringsarbeidet er omregulere det aktuelle arealet til landbruk.

Fylkesmannen har med si handsaming i saka med brev dagsett 24.10.05 gjort slikt vedtak:

Med heimel i plan- og bygningslova § 15, jf. forvaltningslova § 34 og Fellesrundskriv T-8/86 frå Kommunaldepartementet og Miljøverndepartementet, finn fylkesmannen å måtte sende saka tilbake til kommunen for ny behandling av klaga i samsvar med det som er nemnt ovafor. Dette vedtaket er endeleg og kan ikkje påklagast vidare, jf. forvaltningslova § 28.

Fylkesmannen skriv vidare i brevet (24.10.05) under merknader:

Kommuneplanen har blitt til gjennom ein lang og omfattande prosess og det skal såleis ikkje vere kurant å gjere unntak frå planen. Det er i første rekkje forhold knytt til arealbruk og ressursdisponering som skal kunne grunngje ein dispensasjon. Det vert vist til at Norddal prestegard er eit bruk med store ressursar og ein viktig tradisjonsberar for bygda. Kommunen ønskjer at bruket består som eiga driftseining og ein ønskjer difor å omregulere området til landbruk og ein arbeider med å legge ned bygge- og deleforbod for området.

Klagar viser imidlertid i klaga si til ein heil del vektige argument for å dispensere frå plankravet og for at det ikkje er grunnlag for å regulere dette arealet til landbruk, utan at kommunen går inn på desse forholda. Då tenkjer er særleg på at prestebustaden har vore utleigd til næringsformål (Petrines gjestgiveri) sidan hausten 2004, at eigedomen ikkje har vore eit sjølvstendig bruk sidan 1940-talet og at forpaktar- og driftsbygning er selt til kommunen.

Denne saka er eit eksempel på at det politiske utvalet har eit anna syn enn administrasjonen; jfr. innstillinga til vedtak i sak 18/05, møte 14.03.05:

Det faste utvalet for plansaker finn ikkje å gje dispensasjon frå plankravet i kommunenplanen, arealdelen, for å kunne dele frå om lag 6 dekar av Norddal Prestegard, gnr. 52, bnr. 1, slik Opplysningsvesenets fond søkjer om; søknad dat. 19.01.2005.

Det faste utvalet for plansaker finn, i medhald av § 7 i PBL, å kunne gje dispensasjon frå plankravet i kommunenplanen, arealdelen, for å kunne dele frå det som er eksisterande tun, om lag 2,5 dekar av Norddal Prestegard, gnr. 52, bnr. 1, med vising til Opplysningsvesenets fond sin søknad dat. 19.01.2005.

Ein må her kunne skyte inn at administrasjonen har problem med å finne grunnlaget for dei argument Det faste utvalet for plansaker framfører i sine vedtak i sak 18/05 og sak 34/05, men har sjølvsagt respekt for dei vedtak som er gjort og må handle utifrå det.

Prestegarden gnr 52 bnr 1 slik den framstår i dag, er framleis eit bruk med store ressursar og ein strategisk god plassering i høve til dei kultur- og naturverdiane som ein vil vektlegge og utvikle aktivitet i kring i bygda. Trass i at 50 daa av beite er selt til hytteutbygging og at halve tunet med løe er frådelt, er det framleis rom for å kunne satse ut i frå dei ressursane som er att.

Gode argument for å halde oppe ei driftseining:

- 40 mål innmark

- 12 000 da utmark og fjell

- størstedelen av utmarka går inn i verdsarvområdet

- hjortejakt med 6 løyve (gjeld heile garden)

- fiskevatn i lag med Relling og Dalhus

- god seter i Dyrdalen

- godt våningshus

Vidare vil ein kunne bygge vidare på og i samarbeid med dei kulturaktivitetane som pågår i bygda og på den frådelte delen av tunet med paktarstova og løa. Kringsett av verdsarvområdet er det mykje som kan byggast på ut i frå det. Enno står det att i tunet det restaurerte våningshuset frå 1914 og stabburet frå 1600-talet.

Ut i frå dette vil det vere mogleg med ei driftseining, om enn ikkje i det heilt tradisjonelle jordbruket

Saksvurdering og konklusjon:

Denne saka starta med ein søknad frå Ovf (dat. 19.01.05) om dispensasjon frå plankravet i kommuneplanen, arealdelen, og enda med to saker der begge vart klagesaker som vart sendt til Fylkesmannen for avgjer.

Fylkesmannen sine avgjerder i desse sakene ligg føre i brev dagsett 24.10.05 og 23.11.05.

Den naturlege vidare gang i denne saka må vere at kommunen startar aktivt og kontinuerleg med reguleringsarbeidet og at arealbrukssituasjonen vert avklart snarast råd.

Reguleringsplanar skal vedtakast av kommunestyret etter PBL § 27-2. Dette vedtaket vil det vere klagerett på etter PBL § 27-3, jfr. PBL § 15.

Bygge- og deleforbodet fell vekk etter 2 år dersom reguleringsspørsmålet ikkje er endeleg avgjort, jfr. PBL § 33, fjerde ledd.

Vidare kan det opplysast at Ovf har høve til å søkje om dispensasjon frå kommunen sitt vedtak om bygge- og deleforbodet for Norddal Prestegard, gnr. 52, bnr. 1.

Stig Holmstrøm
rådmann