NORDDAL KOMMUNE

Arkiv: 141

Saksmappe: 04/00578-30

Dato: 04.01.2007

Møtebok

Kommuneplanen sin samfunnsdel 2007-2018.

Saksnr. utval	Utval	Møtedato
005/07	Det faste utvalet for plansaker	15.01.07
004/07	Kommunestyret	07.02.07
013/07	Kommunestyret	08.03.07

Utsendte saksdokument:

Kommuneplanen sin samfunnsdel 2007-2018 (revidert)

Høyringsfråsegner frå:

Eidsdal og Norddal bondelag

Møre og Romsdal Fylke

Valldal bygdeutval

Statens vegvesen

Fiskeridirektoratet

Merete Løvoll Rønneberg

Eldrerådet

Ikkje utsendte saksdokument:

Planprogram og visjonsbilete

Handsaming i Det faste utvalet for plansaker 15.01.07:

Forslag frå Signe Brenna, Nl:

Følgjande punkt under ”Endringsvilje og endringsevne” vert stroke:

· Tenkje utover; den viktigaste arenaen og marknaden for kommunen ligg utanfor kommunegrensene.

Røysting:

2 røysta for forslaget frå Signe Brenna som fall.

5 røysta for innstillinga.

Forslag frå Arne Sandnes, Sp:

”Trivselshagen” vert erstatta av ”ein verdsarvkommune”.

Røysting:

6 røysta for forslaget frå Arne Sandnes

1 røysta for innstillinga

Fellesforslag frå Arne Sandnes, Sp og Viktor Valdal, Al:

Norddal kommune ser behovet for ei storstove i kommunesenteret, og vi bør starte eit utgreiings- og planleggingsarbeid.

(Dette punktet erstattar siste setning under ”Bygningar og anlegg” s. 13 i planen.)

Røysting:

5 røysta for forslaget frå Arne Sandnes og Viktor Valdal

2 røysta for innstillinga

Forslag frå Viktor Valdal, Al:

Følgjande endring i formulering s. 22 under ”Vegnettet til og frå kommunen skal ha god standard”:

· Utbetre og forkorte Rv 650 mellom Viset og Sjøholt

Røysting:

Samrøystes i samsvar med forslaget frå Viktor Valdal

Forslag frå Arne Sandnes, Sp:

Nytt kulepunkt s. 22 under ”Fjorden kan vere ei viktig ferdselsåre”:

· Utgreie fergefritt samband mellom bygdene i Norddal.

Røysting:

Samrøystes i samsvar med forslaget frå Arne Sandnes

Forslag frå Magne Almstad, Frp:

Nytt kulepunkt under gang- og sykkelvegar:

· Gang- og sykkelveg gjennom Fjørå-tunnelen

Røysting:

Samrøystes i samsvar med forslaget frå Magne Almstad

Forslag frå Merete Løvoll Rønneberg, Sp:

Nytt kulepunkt inn i 1. spalte ”kommunal identitet” s. 18:

· Leggje til rette for aktive og livskraftige grender i heile kommunen.

S. 19, kulepunkt 4 på pkt 2.3:

Punktet vert stroke.

S.21 om primærnæringane, nytt kulepunkt inn først:

· Arbeide aktuelt og målretta opp mot styresmaktene i landet, for å synleggjere verdien av aktive gardsbruk, både for området, og for nasjonen totalt sett.

S. 21 om primærnæringane, endring av ordlyden i kulepunkt 1:

· Motivere grunneigarane og vere ein aktiv medspelar for grunneigarar som ser, eller ynskjer å utvikle, fleire moglegheiter på eigen gard.

S. 21, kulepunkt 3:

Punktet vert stroke.

S. 21 om primærnæringane, tilføying av nytt kulepunkt:

· Arbeide for å utnytte ressursane og moglegheitene i primærnæringane, for å skape nye arbeidsplassar t.d. innanfor grøn omsorg, opplæring eller andre område.

s. 22 samferdsle, utviding av første punkt:

· Utviding av tunnellane til Fjørå og Tafjord slik at store køyretøy kan kome gjennom, og betre lysforholda dei same tunnellane.

S. 22 samferdsle, utviding av kulepunkt 4:

· Sikre vegen austover over Geiranger slik at sesongen kan utvidast, og arbeide vidare for at dette skal bli heilårsveg austover.

S. 22 gang- og sykkelvegar, nytt kulepunkt:

· Utbygging av gang- og sykkelveg mellom Eidsdal og Norddal.

Røysting:

Alle forslaga om tilføyingar/endringar frå Merete Løvoll Rønneberg vart samrøystes vedtekne.

Handsaming i Kommunestyret 08.03.2007:

Petter Melchior, Sp kom med slike endringsforslag til planen:

Samferdsle, s. 24:

Første og siste punkt under ”Fjorden kan vere ei viktig ferdselsåre og ikkje berre eit stengsel”:

1. Utvida og betre fergetilbod, der nattferge og større kapasitet er viktig.

2. Vidareutvikle småbåthamnene i kommunen.

Røysting:

Samrøystes i samsvar med Petter Melchior sitt forslag.

Merete Løvoll Rønneberg, Sp kom med forslag om slik endring: ”Fjorden er ei viktig ferdselsåre og ikkje berre eit stengsel”.

Røysting:

Samrøystes i samsvar med Merete Løvoll Rønneberg sitt forslag.

Signe Brenna, Nl kom med forslag om slikt nytt hovudmål i planen:

Miljø og berekraftig utvikling

MÅL: Norddal vil at aktivitetane i lokalsamfunnet vårt skal skje innanfor bereevna i naturen og i eit reint, ryddig og triveleg nærmiljø.

HOVUDMÅL 1:

Forvaltning av naturressursane:

Norddal kommune vil at aktivitetane i lokalsamfunnet vårt skal skje innanfor bereevna i naturen, og slik at nødvendige inngrep i naturen i minst mogleg grad går ut over naturverdiane. Kommunen skal

balansere behova for bruk og vern av areal, naturressursar og biologisk mangfald; dette gjeld på land, i sjø, i ferskvatn og vassdrag,
bevare jordbruksareala og dei produktive skogbruksareala,
kartleggje i samarbeid med innbyggjarane kva område som har størst verdi for friluftsliv, rekreasjon og idrett med sikte på å unngå å bandleggje slike område til andre føremål,
revidere hyttemeldinga parallelt med arealplanen slik at vi får ein heilskapeleg hyttepolitikk, og kan sjå dei ulike utbyggingsønska samla og vurdere arealdisponeringa langsiktig,
kartleggje vassdraga våre opp imot ønske eller planar om å byggje ut småkraftverk, og gjere ei langsiktig vurdering av kvar og i kva målestokk det er ønskjeleg å byggje ut, og kva område vi ønskjer å halde inngrepsfrie,
kartleggje og vurdere strandsona heilskapleg slik at vi kan sikre inngrepsfrie samanhengande strandområde,
sikre større samanhengande område med høg landskaps- og opplevingskvalitet,
halde ved lag ubrotne grøne korridorar frå fjord til fjell.

HOVUDMÅL 2:

Ein miljøvenleg kommune.

Norddal ønskjer å vere ein kommune med høg merksemd om miljøet, i vidaste tyding. Kommunen skal

leggje til rette for miljøvenleg forbruk og produksjon i kommuneorganisasjonen,
arbeide for å auke medvitet om og motivasjonen til å velje miljøvenlege energikjelder og andre enøk-tiltak,
leggje til rette for å kunne bruke kollektive transportmiddel og å kunne gå eller sykle mellom daglege gjeremål,
føre ein restriktiv politikk for motorisert ferdsel på barmark, likeins for bruk av snøskuter og liknande vinterstid,
bidra til at befolkninga og tilreisande har tilgang på reint vatn og rein luft.
sikre god avløps- og avfallshandtering i heile kommunen,
profilere miljøvenleg reise- og friluftsliv sterkare,
sikre reine og trivelege sentrum og møtestader i alle delar av kommunen,
vere medviten om å ta vare på alle menneske som bur og arbeider i kommunen, og arbeide for at alle skal ha eit trygt og triveleg bu- og arbeidsmiljø,
arbeide for at særleg oppveksande generasjonar får eit høgt miljømedvit, mellom anna gjennom påverknad frå barnehage og skule.
ta vare på biologisk mangfald (nøkkelbiotopar, sjeldne og kravfulle vegetasjonstypar),
vurdere tiltak for å redusere eller fjerne gamle inngrep som ikkje har nokon funksjon,
så snart som råd utarbeide ein energi- og klimaplan,
planleggje alle offentlege bygg med tanke på energiøkonomisering og miljøvenleg energi.

HOVUDMÅL 3:

Ein trygg kommune

Norddal kommune skal vere ein trygg kommune å bu i, men skal samstundes vere budd på kriser eller uønskte hendingar. Kommunen skal

arbeide for å gjere det mindre sannsynleg at uønskte hendingar eller kriser oppstår,
vere i stand til å handtere uønskte hendingar og kriser for å kunne redusere konsekvensane av desse så godt som råd.

Solveig Linge Stakkestad, Sp kom med forslag om at skal vert erstattast med bør under punktet ”MÅL”.

Det vart først røysta over Solveig Linge Stakkestad sitt endringsforslag:

17 røysta for forslaget

2 røysta i mot

Røysting:

Forslaget om nytt hovudmål i planen vart samrøystes vedtatt med endringsforslaget til Solveig Linge Stakkestad.

Aksjonslista og Arbeiderpartiet kom med slikt fellesforslag om eit slikt nytt pkt. under Samferdsle, s. 24:

Arbeide for utbygging av sommarveg frå Tafjord og austover til Skjåk.

Røysting:

Samrøystes i samsvar med fellesforslaget frå Al og Ap.

Viktor Valdal, Al kom med slikt forslag:

Nemninga på planen skal vere: Norddal – trivselshagen.

Røysting:

6 røysta for forslaget frå Viktor Valdal som fall

13 røysta for innstillinga

Endeleg avrøysting:

Samrøystes i samsvar med innstillinga og dei endringane som vart vedtatt i møtet.

Saksgrunnlag:

Vedtak i Kommunestyret - 29.06.06:

Kommunestyret vedtek å legge planen ut til offentleg ettersyn. Høyringsfristen blir sett til 30. september 2006.
Norddal kommune vedtek at endringsforslaget til Merete Løvoll Rønneberg vert å følgje planen som vedlegg og handsama som høyringsfråsegn før endeleg vedtak vert fatta

Saksopplysningar:

Til kommuneplan, kommunedelplanar og større reguleringsplanar skal det lagast planprogram. Reglane for utarbeiding av planprogram er fastsett i Forskrift om konsekvensutgreiingar kap.III §§ 5 – 12. Planprogrammet er ein rapport om korleis planarbeidet skal gjennomførast. Slikt planprogram vart behandla i 2005.

Med utgangspunkt i dette, vart det leigd inn prosessrettleiar og kommunestyret utforma visjonsbileta og hovudsatsingsområde våren 2005. Undervegs vart det halde ulike informasjons- og kontaktmøte.

Kommunestyret konkluderte på kva som skal vere satsingsområda i planperioden, men eg finn ikkje at tilsvarande konklusjon vart gjort for kva samfunnssyn (visjon for lokalsamfunnet Norddal) som skulle leggast til grunn. Her har derfor arbeidsgruppene som tok til i årsskiftet 2005/06, gjort ein litt tilbakehaldande eller forsiktig konklusjon ut ifrå dei tre ulike bileta som vart trekt opp undervegs.

Før sommaren 2006 vart det vedteke at framlagt planframlegg skulle leggjast ut til høyring. Det er komne seks merknader/kommentarar til planframlegget.

Desse blir ikkje her drøfta i detaljert form, då dei i stor grad er kommentarar til eksisterande element i planen. Dei ulike kommentarane er i stort monn innarbeidd i planen.

Vidare kan det sjå ut som at eit lite byråkratisk og lite ordrikt planformat synest noko uvant. Det er også slik at sjølv om det er trekt opp konkrete retningar og innsatsområde for utviklinga av lokalsamfunnet Norddal, så kan ikkje kommunen legge bort anna lov- og forskriftsfesta planlegging og framhaldande arbeid. Men alt dette kan ikkje innarbeidast i samfunnsdelen. Framleis er det slik at td beredskapsarbeidet må vere eit sentralt element, ikkje minst i høve skredfare som kan lamme delar av samfunnsutviklinga. Kommunen er derfor aktiv medspelar i Åknes/Tafjord-prosjektet.

Merete Løvoll Rønneberg har levert eit konstruktivt bidrag som

-fokuserer på overordna tenking i høve generelt samfunnssyn, (Fredrikstad-erklæringa)

-den nye vernestatusen for delar av Norddal og behovet for å presisere dette sterkare.

-Vidare presiserer ho behovet for at planen blir utvida i høve miljø- og naturvern.

-Ho påpeiker eit behov for verbale presiseringar.

Kommunestyret har tidlegare slutta seg til Fredrikstad-erklæringa. Dermed må denne tenkinga i høve berekraftig utvikling ligge fast. Eg meiner at planen er eintydig på dette overordna prinsippet. Det blir opplyst at kommunen no deltek i pilotprosjektet ”Livskraftige kommuner – Kommunenettverk for miljø- og samfunnsutvikling.” Målsettinga er å styrke kommunane si rolle som samfunnsutviklar og pådrivar for ei berekraftig utvikling. Rapport i høve prosjektet finn ein på www.ks.no. Det er å vente at ei så sterk prioritering frå kommunen si side vil forsterke og konkretisere denne overordna tenkinga i tida som kjem. Eg ser derfor ikkje at dette vedtekne overordna prinsippet for den lokale samfunnsutviklinga ikkje er tilfredsstillande teke omsyn til både i planen og i praksis.

Framlegga til målsetjingar i høve miljø- og naturvern er innarbeidd i hovudmålet NaKuHel.

Ut over dette er Merete Løvoll Rønneberg sine presiseringar i høve ny vernestatus innarbeidd, og i nokon grad også språklege presiseringar.

Saksvurdering og konklusjon:

Også eit planarbeid skal vere berekraftig. Punktvis tyder dette:

Planlegginga skal fremje berekraftig utvikling.
Planlegginga skal vere demokratisk og styrt av folkevalde organ.
Planlegginga skal fremje heilskap og sikre samordning og samarbeid.
Planlegginga skal vere målretta og ikkje meir omfattande enn nødvendig.
Planlegginga skal vareta og avvege både kommunale, regionale, nasjonale og internasjonale omsyn og interesser.
Planlegginga skal vere forpliktande og føreutseibar.

Slik rådmannen ser det, har prosess og planinnhald i tilstrekkeleg grad teke omsyn til desse momenta. Formatet er rett nok uvant lite byråkratisk utforma og tilsvarande ordknapt. Det er såleis rom for at planen kan bli oppdatert etter kvart som kommunen skaffar seg meir kunnskap, praksis og resultat innanfor prinsipp og satsingsområde. Det er også lagt opp til at det er mogleg å velgje ut kva tidlegare utarbeidd dokumentasjon som kan vedleggast som del- (”sektor-”) planar. Det blir gjort framlegg om at planarbeidet blir oppfølgd med utarbeiding av to delplanar knytt til måla: Endringsvilje og endringsevne, og Næringsutvikling. Eksisterande planar innanfor desse hovedmåla må da bli noko tilpassa samstundes som ei større heilskapstenking må byggast opp.

Stig Holmstrøm
rådmann

NORDDAL KOMMUNE

Arkiv: 141

Saksmappe: 04/00578-30

Møtebok

Rådmannen si innstilling:

Innstilling i Det faste utvalet for plansaker - 15.01.07:

Vedtak i Kommunestyret - 07.02.2007:

Miljø og berekraftig utvikling

Vedtak i Kommunestyret - 08.03.2007:

Saksgrunnlag:

Vedtak i Kommunestyret - 29.06.06:

Saksopplysningar:

Saksvurdering og konklusjon: