- Kommunestyret
vedtar at det vert sett i gang arbeid med Energi- og klimaplan for Norddal
kommune, og ber rådmannen fremje sak om organisering av arbeidet.
- Som
ein oppstart og ein del av arbeidet med Energi- og klimaplan, vert det
søkt prosjektstøtte for vurdering av fjernvarme i sentrumsområdet og
Murigrandane.
- Eigenfinansiering
på kr.120.000,- vert dekt over ubrukte midlar på investeringspost
6114.3233 Industribygg Djupøyna.
Saksgrunnlag:
I samband med arbeidet med realisering av dei ulike
byggeprosjekta på Murigrandane, har det vore send administrativ søknad gjennom
Enøk-senteret i Ørsta for vurdering av alternativ energiforsyning med
fjernvarme i området. Samla budsjettert utgreiing/forprosjektkostnad er kr.
262.000,-, medan søknadssummen til Enova er kr.100.000,-.
Saksopplysningar:
I samfunnsdelen i kommuneplanen er det vedtatt seks
satsingsområde, der ”Miljø og berekraftig utvikling” er eitt av områda. Under
hovudmål 2 ”Ein miljøvenleg kommune”, heiter det i eitt av kulepunkta: ”Kommunen skal så snart som råd utarbeide ein
energi- og klimaplan.”
I samband med budsjetthandsaminga i
kommunestyret 16.12.06 (budsjett 2007), vart det m.a. gjort
følgjande vedtak (pkt. 8): ”Alle nye offentlege bygningar i Norddal
kommune skal planleggast med
tanke på energiøkonomisering og bruk av
alternativ, miljøvenleg energiforsyning.
Administrasjonen skal
i samarbeid med det nye kommunale eigedomsselskapet vurdere den kommunale
bygningsmassen og gjere framlegg om ENØK-tiltak og eventuell mogleg bruk av
alternative, miljøvenlege energikjelder.”
For å vurdere søknaden om prosjektmidlar, stiller Enova krav
om at det skal vere gjort politisk vedtak i kommunen om utarbeiding av ein
kommunal Energi- og klimaplan. I søknaden til Enova har ein gått ut frå at dei
føringane som har vore gjort gjennom samfunnsdelen i kommuneplanen og gjennom
budsjettvedtaket i desember 2006, har vore eit godt nok grunnlag for vurdering
av søknaden vår. Enova stiller imidlertid krav om at det er gjort eit eige
eksplisitt vedtak om dette.
Saksvurdering og konklusjon:
Ein Energi- og klimaplan vil vere ein handlingsplan som
viser korleis kommunen skal arbeide med energi- og klimaspørsmål i eit
heilskapleg perspektiv. Han skal innehalde konkrete mål, prioriterte tiltak og
tidsrammer. Planen omfattar energiproduksjon og energibruk, tilgang på
ressursar og utslepp av klimagassar, m.m. Planen skal vere eit grunnlag for
alle avgjerder som involverer energibruk og klimaspørsmål.
Ein må rekne med at det i løpet av kort tid vert stilt krav
til alle kommunar om å utarbeide ein eigen Energi- og miljøplan, og med dei
føringane som ein har gitt politisk gjennom samfunnsdelen i kommuneplanen og i
budsjettvedtak, jfr. ovanfor, er det berre naturleg at ein no gjer eit slikt
eksplisitt vedtak i kommunestyret. Med dei mulegheitene ein ser i nær framtid
for utnytting av spillvarme frå Valldal Grønt sin fryseproduksjon, vil det vere
naturleg å utgreie desse som ein oppstart på, og ein del av, arbeidet med ein
slik plan.
Rådmannen nemner til slutt at Norddal kommune si deltaking i
KS-prosjektet ”Livskraftige kommuner”, der utarbeiding av indikatorar for
positiv og berekraftig samfunnsutvikling er ein vesentleg del av arbeidet, fell
godt saman med det arbeidet som må gjerast for å lage ein Energi- og klimaplan
for kommunen.
