- Norddal
kommune avsluttar ungdomsprosjektet i si noverande form..
- Overskot
frå prosjektet vert overført til ungdomsfondet.
- Revidert
prosjektrekneskap skal leggast fram for formannskapet til orientering.
Saksgrunnlag:
Ungdomsprosjektet har vart i ca 1 år. På grunnlag av rapportar
og uttale må ein vurdere om prosjektet skal vidareførast eller ikkje.
Saksopplysningar:
Formannskapet vedtok i møte 18.05.04 å gjennomføre tiltaket
Forprosjekt Ungdom i perioden 1. juni – 1. oktober 2004. Det vart vidare
vedtatt i møte 18.11.04 at prosjektet skulle vidareførast i eit hovudprosjekt
på inntil tre år.
Prosjektet har gått frå å vere eit prosjekt retta mot ungdom
til å vere eit meir generelt mobiliseringsprosjekt retta mot fleire målgrupper.
Det vart vedtatt at kostnadane skulle søkjast dekt som eit
spleiselag mellom blant anna kommunen, fylket og lokalt næringsliv. Totale
kostnader for år 1 vart sett å vere kr 610.000. Dei kommunale kostnadane til
det første året vart dekka gjennom næringsfondet 2005 i den første runden av
næringsfondsaker 07.02.05, og kom på totalt kr 264.000. Møre og Romsdal fylke
si næringsavdeling støtta prosjektet med kr 250.000 frå sitt tiltaksfond
”program for næringsutvikling og busetting”. Næringslivet og
kompensasjonsmidlane knytt til differensiert arbeidsgjevaravgift har støtta
tiltaket med resterande dvs kr 96.000. For år 2 er kr 35.000 allereie dekka frå
næringslivet, og ein reknar òg med at ein kan få støtte hjå
kompensasjonsmidlane.
Prosjekteigar er Norddal kommune, men prosjektet vart lagt
administrativt til Fjordhagen, der prosjektleiar har hatt kontor.
Stillinga som prosjektleiar vart lyst ut med søknadsfrist 1.
juli 2005, og prosjektleiar var på plass 1. oktober 2005. Årsaka til at det tok
så lang tid frå vedtaket vart gjort til stillinga vart lyst ut, var at arbeidet
ikkje var godt nok forankra i administrasjonen. Det var òg usikkert kven som
skulle gjere arbeidet med å hente inn midlar frå næringslivet.
Møre og Romsdal fylke sette vilkår for å få støtte til eit
år 2 på at det må verte oppretta samarbeid med nabokommunane Stordal og Stranda
på tiltaksnivå, samt opprette koordinering med pilotprosjektet ”Kommunane som
førstelinje for småskala næringsutvikling” (Kommuneprosjektet) som Stranda og
Norddal kommune er engasjert i. Dette nasjonale pilotprosjektet vert avslutta
ved utgongen av 2006. Prosjektleiar har hatt 80 % stilling i ungdomsprosjektet
og 20 % stilling i pilotprosjektet. Det vil verte opp til fylket å vurdere om
desse kriteria er oppfylde i år 1.
I styringsgruppa sit varaordførar Merete Løvoll Rønneberg og
næringskonsulent Torill Monstad, som representerar eigaren av prosjektet, samt
Gerd Myren Hoel og Nils Jarle Hjelme frå næringslivet.
Næringssjef Toralv Klokkehaug kom med heilt mot slutten.
Det er utarbeidd ein rapport på grunnlag av erfaringane det
første året. Her kjem det fram at grunnlaget for prosjektet var Forprosjektet
Ungdom som hadde 25 forslag til delprosjekt.
I styringsgruppemøte februar 2006 vart desse delprosjekta
prioriterte:
Tiltak forankra i landbruksplanen
Kompetansebank
Velkomstpakke
Entreprenørskap i skulen
I rapporten som er framlagt kjem ein inn på ulike
problemstillingar og utfordringar, men lite konkret.
I uttalen frå styringsgruppa er det ein god del merknader
slik som:
Vanskeleg å sjå resultat av det arbeidet som er lagt ned.
Arbeidet er for lite målretta og spreier seg over veldig
mykje.
Kommunikasjonen mellom prosjektleiar/prosjektansvarleg og
styringsgruppa kunne ha vore betre.
Dei har fylgjande konklusjon:
Styringsgruppa finn
ikkje å kunne tilrå at ”ungdomsprosjektet” går inn i eit år to, i alle høve
ikkje i den form det har no. Dersom
ein ynskjer ei vidareføring, bør dette, etter vårt syn, skje på følgjande
vilkår:
- Det vert utarbeidd ei skisse til
vidare arbeid/satsingsfelt, og dette vert så handsama politisk.
- Det vert oppnemnt styringsgruppe frå
politisk hald
- Det vert drøfta og tatt avgjersle på
kven som skal vere prosjektansvarleg vidare.
Saksvurdering og
konklusjon:
Formålet med prosjektet er å auke trivselen til
innbyggjarane, og auke sysselsetting ved oppretting og vidareutvikling av
private og offentlege verksemder.
Positive haldningar til verdiskaping og vilje og fokus på
næringspolitikk er viktige suksesskriterium for livskraftige lokalsamfunn med
bedrifter som veks. Undersøkingar viser at kommunar med mange bedrifter i vekst
og entreprenørar er meir målretta og ambisiøse i sin næringspolitikk enn
kommunar utan. Ein ynskjer at dette prosjektet skal vere ein del av kommunen si
satsing på næringsutvikling.
Forprosjektet skisserte totalt 25 tiltak som kunne vere
aktuelle i eit hovudprosjekt. Styret har vedtatt ein spissa prosjektplan basert
på desse, som det forventas at prosjektleiar arbeidar ut i frå. Til no har
prosjektleiar engasjert seg i mange ulike tiltak, som rapporten viser.
Skal prosjektet vere vellukka, må det arbeidast meir
fokusert på dei strategiane og tiltaka som styret legg opp til. Det må ikkje
brukast tid og krefter på delprosjekt som ligg meir til førstelinjetenesta i
kommunen eller hjå lag og foreiningar i kommunen.
Næringssjefen har vurdert ungdomsprosjektet og vil først
gjere merksam på namnet på prosjektet har lite med det innhaldet ein har
arbeidet med. Utgangspunktet har vore 25 delprosjekt som ein har forsøkt spissa
utan å lukkast noko godt med dette. Ein stor svakheit har vore at verken
styringsgruppe,
prosjektansvarleg/prosjekteigar og kommunen har hatt god
styring på det som har skjedd. Det har på ein måte blitt ”alt mulig og ingen
ting.”
Til orientering kan nemnast at næringssjefen har arbeidet
ein god del med ungdomsrådet med tanke på oppretting av eit ungdomsfond i
kommunen. Her har ein kome langt og saka skal slutthandsamast i ungdomsrådet
torsdag 10. mai. Resultatet av dette arbeidet kjem ein attende til.
Næringssjefen kan vere med på vidareføring av prosjektet
dersom det vert klare politiske signal på kva ein skal arbeide vidare med, og
kven som skal sitte i styringsgruppa.
Ser for meg at spørsmål vedrørande ledige hus/gardsbruk og
tomteareal for utbygging må vere det viktigaste satsingsområdet no framover.
Dette har si forankring i både kommuneplanen og landbruksplanen.
…………………………………………………………………………………………………………..
Nye opplysningar til
formannskapsmøte 17.09.07
Prosjektøkonomi
Prosjektrekneskapen er enno ikkje avslutta, men ein har
endeleg oversikt over utgiftene som Fjordhagen AS har hatt. Samla lønskostnader
er på kr 353.718,03 og driftskostnadene er på
kr 72.279,78. Sum kostnader kr 425.997,81.
På inntektssida er det kome inn kr 352.000,-. Her finn ein
kommunen sitt bidrag på kr 264.000,- og tilskot frå næringslivet. Møre og
Romsdal fylke har løyvd kr 250.000,- der ein enno ikkje har bedt om utbetaling.
Oppmoding om utbetaling av 75 % av tilskotet (kr 187.500,-) er sendt
10.09.2007. Rekneskapen må reviderast før siste delen av tilskotet kan
utbetalast.
Inntekter
Kommunalt tilskot 264.000,-
Næringslivet 88.000,-
Møre og Romsdal fylke 250.000,-
enno ikkje utbetalt
SUM 602.000,-
Utgifter 425.997,81
Prosjektet hadde eit utgiftsbudsjett på kr 612.298. Når
utgiftene vart mindre, skyldast dette ikkje lønskostnadene, men posten
rekvisita, møte, bilgodtgjersle og reklamekostnader og prosjektkostnad/tiltak
som vart ca 150.000,- mindre enn budsjettert.
Dersom Møre og Romsdal fylke betaler ut heile tilskotet, vil
vi få eit ”overskot” på ca 140.000,-.
Dette er midlar som kan nyttast til ungdomsfondet
(”Hoppekassa”) Dette er ei nyskaping med fokus på unge etablerarar. Tidlegare
forslag om å nytte ”overskotet” til kartlegging av ledige gardsbruk vert trekt.
Prosjektet bør avsluttast i si noverande form der
”overskotet” kan gå inn i tiltaksdelen og prosjektet kan kome i balanse og
avsluttast.
Formannskapet fatta vedtak i møte 14.05.2007 om at
administrasjonen skulle grunngi utsegn i saksutgreiinga. Rådmannen er i tvil om
kva for utsegn det er tale om og ber om ei avklaring i møtet.
………………………………………………………………………………………………………
Rådmannen legg fram
slik ny innstilling til møtet 17.09.2007:
- Norddal
kommune avsluttar ungdomsprosjektet i si noverande form..
- Overskot
frå prosjektet vert overført til ungdomsfondet.
- Revidert
prosjektrekneskap skal leggast fram for formannskapet til orientering.
