Møtebok
Revidering av retningslinjer
for kulturmidlar
|
Saksnr.
utval
|
Utval
|
Møtedato
|
|
060/06
|
Driftsutvalet
|
02.10.06
|
|
055/06
|
Kommunestyret
|
18.10.06
|
Utsendte saksdokument:
Utkast til nye retningslinjer
Utkast til informasjonsbrosjyre
Ikkje utsendte
saksdokument:
Eksisterande retningslinjer, vedtekne i utval for oppvekst
og kultur, sak 04/01
Rådmannen si innstilling:
1.
Norddal kommune vedtek utkast til nye retningslinjer for
kulturmidlar.
-----------------------------------------------------
Saksgrunnlag:
Kommunen ønskjer å vere ein aktiv medspelar i utvikling av
kulturlivet i kommunen, og fordeling av kulturmidlar er ein viktig brikke i
dette. Det er behov for ein gjennomgang av retningslinjene for tildeling av
kulturmidlar for å sjå om tilskota treff målretta nok.
Saksopplysningar:
Lag og organisasjonar driv eit godt og mangfaldig
kulturarbeid. Norddal kommune ønskjer å støtte opp, og leggje forholda til
rette for dette arbeidet. 250.000 har årleg blitt fordelt, der 100.000 kr går
til idretten og resten til det øvrige kulturlivet. I tillegg blir det årleg
sett av ein pott på 150.000 kr til fordeling av spelemidlar. Tilskotet bør
liggje på eit slikt nivå også dei komande åra. Den frivillige innsatsen som
blir lagt ned er av uvurderleg verdi for kommunen.
Kommunen hadde tidlegare ei ordning med ekstra midlar til
sommarrangement som formannskapet forvalta. Det har etter kvart vorte svært
mange flotte arrangement på sommaren som er med og set kommunen på kartet, og
ein betydeleg dugnadsinnsats blir lagt ned. Kommunen har vore med og støtta
tiltaka nokre år til dei greier å stå på eigne bein. Kommunen har fått innspel
frå arrangement som ønskjer ein fast pott frå budsjettet, og dermed sleppe å
søkje kvart år.
Driftsutvalet vedtok i sak 21/06 at kommunen vil yte inntil
10 % av kostnadene ved rehabilitering av kulturbygg som søkjer statlege midlar
med ei maksimumsgrense på 150.000 kr. Kvar sak skal vurderast i eiga politisk
sak, og rammene i kulturbudsjettet vil vere avgjerande.
Kommunen yter andel til idrettsanlegg som får statlege
spelemidlar. Til no har kommunen bidratt med 1/3 av kostnadene. Budsjettet vil
i åra framover vise om ein klarar å halde på denne storleiken. Det varierer kor
mykje kommunane rundt omkring bidreg med. Nokre kommunar yter ikkje midlar,
andre ligg på 10-20 % medan andre yter 1/3 slik som Norddal har gjort til no.
Saksvurdering og konklusjon:
Retningslinjene bør vere smidige og bidra til å utvikle
kulturlivet. Fleire kommunar har i tillegg til dritsstøtta også ein
aktivitetspott som det kan søkjast på når spesielle tiltak skal settast i verk.
Dette bidreg til å gjere det tryggare å prøve ut nye ting. Dei siste åra har
fleire nyskapingar etablert seg. Kommunen bør bidra til ei slik utvikling,
samstundes som det er svært viktig å ivareta det som allereie eksisterer.
Kriteriar som medlemstal, aktivitet, målgruppe og økonomi
ligg til grunn for tildelinga. Ein del kommunar har klar fokus på lag som
arbeider mot barn og unge, og dei blir også mest til gode sett i Norddal. Ein
har likevel ytt støtte til dei fleste lag og organisasjonar. Alle gjer eit
viktig arbeid, og m.a. pensjonistforeiningane har ikkje så mange
inntektskjelder.
Det har vore gitt eit tilskot til forsamlingshus av
kulturmidlane. Potten har vore 25.000 der halvparten går til drift og andre
halvparten til investeringar. 2-3 husprosjekt får eit lite tilskot på 3000-4000
kr noko som monnar lite når store rehabiliteringar står for tur. Reglementet
vert foreslått endra slik at det blir ei rein investeringsstøtte på inntil
25.000 kr totalt. Det kan maks gjevast tilskot til to bygg per år.
Ein bør vurdere å auke potten slik at ein kan gi
arrangementstøtte til spesielle arrangement. Praksisen dei seinare åra har vore
at kommunen har vore medspelar i ulike prosjekt i ei oppstartfase til ein har
fått økonomien og konseptet på plass. Deretter har kommunen trekt seg ut. Årleg
kjem det søknader frå arrangørar som ønskjer kommunal medverknad i den vidare
satsinga også. Tilbakemeldinga frå kommunen har vore at driftsstøtta til lag og
organisasjonar vert gitt gjennom kulturmidlane.
Lag og organisasjonar får nytte kommunale bygg gratis til
faste treningar/øvingar. Ved spesielle arrangement må dei betale meirutgifter
til m.a. reinhald. Dette er eit viktig og svært positivt bidrag til det
frivillige kulturlivet.
Mange lag slit med å få på plass leiarar og andre
styremedlemmer. Ein bør difor vurdere å etablere ei ordning for støtte til
leiaropplæring innan barne- og ungdomsarbeid.
Ungdomsarbeid er viktig. Ungdomsrådet må ta stilling til om
dei ønskjer å få oppretta eit ungdomsstipend som kan hjelpe unge, aktive
kulturtøvarar til å søkje utvikling og framgang på sine område.
Det er på gang eit omfattande arbeid med å leggje til rette,
merke og vedlikehalde stiar i kommunen, og få desse ned på eit turkart.
Prosjektet har fått spelemidlar både til tilretteleggingsbiten, og til
kartproduksjonen. Vedlikehaldsbiten er svært viktig, og det må på plass midlar
for å kunne få utført dette arbeidet. Det aller meste blir gjort på dugnad, men
ein del stiar må ein kanskje få t.d. lag og organisasjonar til å ta mot eit
honorar. Det må tenkjast ut ei tenleg ordning her.
For å kunne imøtekome nye søknader bør kulturbudsjettet
styrkast, eller ein må omprioritere eksisterande midlar. Kommunen har
prioritert å halde på storleiken på kulturmidlane, fordi ein ser kor viktig
dette arbeidet er for lokalsamfunnet og trivselen. No er det nye ting på plass,
og spesielt satsinga mot friluftsliv og stirydding vil bli ein viktig og fast
post på budsjettet. Kanskje kan ein del av kulturmidlane øyremerkast slik at
lag/foreiningar får ekstra tilskot viss dei tek på seg ansvar for vedlikehald
av ein del råser.
Det bør lagast ei brosjyre som informerer om ulike
støtteordningar innanfor kulturbudsjettet. I tillegg bør lag og organisasjonar
bli flinke til å leite etter eksterne støtteordningar
