NORDDAL KOMMUNE

Arkiv: 142 Saksmappe: 06/00689-45 Sakshandsamar: Stig Holmstrøm Dato: 18.06.07

Møtebok

Planprogram for arealdelen av kommuneplanen

Saksnr. utval	Utval	Møtedato
036/07	Det faste utvalet for plansaker	25.06.07

Utsendte saksdokument:

Planprogram kommuneplan, arealdelen

Møre og Romsdal fylke, brev av 29.03.07

Statens Vegvesen, brev av 19.03.07

Norges Vassdrags- og energidirektorat, brev av 08.02.07

Øvre Valldal Utvikling BA, brev av 26.03.07

Valldal Golfklubb, brev av 31.05.05 og 08.06.05

Bergvesenet, brev av 26.04.07

Naturvernforbundet, brev av 05.06.07

Ikkje utsendte saksdokument:

Rådmannen si innstilling:

I samsvar med §6 i Forskrift om konsekvensutgreiinga, vedtek Det faste utvalet for plansaker revidert framlegg til Planprogram kommuneplan, arealdelen, dagsett 07.06.07.

Handsaming i Det faste utvalet for plansaker 25.06.07:

Forslag frå Signe Brenna:

Tilføying i pkt. 6 i: ”produksjonsareal”

Det vart røysta over forslaget frå Signe Brenna som fall med 3 mot 4 røyster

Vedtak i Det faste utvalet for plansaker - 25.06.07:

I samsvar med §6 i Forskrift om konsekvensutgreiinga, vedtek Det faste utvalet for plansaker revidert framlegg til Planprogram kommuneplan, arealdelen, dagsett 07.06.07.

Saksgrunnlag:

Til kommuneplanar, kommunedelplanar og større reguleringsplanar skal det utarbeidast eit planprogram, som skildrar korleis planarbeidet skal gjennomførast. Reglane for utarbeiding av planprogram er fastsett i Forskrift om konsekvensutgreiing kap. III §§ 5-12.

Kommunestyret i Norddal vedtok i sak 58/06 i møte 18.10.06 at det faste utvalet for plansaker skal stå for utarbeiding, utlegging til offentleg ettersyn og vedtak av planprogram i samband med rulleringa av arealdelen til kommuneplanen 2007-2018.

I sak 66/06 vedtok planutvalet å legge eit forslag til planprogram ut til offentleg ettersyn i 6 veker.

Saksopplysningar:

Forslag til planprogrammet har lagt ute til offentleg ettersyn, og det er halde oppstartmøte.

Mange av merknadane som har kome inn gjeld sjølve arealbruken i kommuneplanen, og ikkje innhaldet i planprogrammet. Merknadane som gjeld arealbruken vil bli referert og behandla når forslag til plan blir lagt fram. No i første omgang blir merknadane som gjeld innhaldet i planprogrammet referert og vurdert.

Saksvurdering og konklusjon:

Føgjande innspel har kome på innhaldet i planprogrammet:

Møre og Romsdal fylke, brev av 29.03.2007:

• Disposisjonen i planprogrammet bør endrast, slik at punkt 3 – ”Organisering av planarbeidet” og punkt 4 – ”Informasjon og medverknad” blir framstilt på ein meir strukturert og oversiktleg måte. Programmet bør bli eintydig på kva som skal gjerast og når ting skal skje.

Vurdering: Desse punkta er vurdert å vere tilfredsstillande oversiktlege. Under punkt 6 – ”Utfordingar for Norddal kommune” og punkt 7 – ”Naudsynte utgreiingar” er programmet gjort meir utfyllande. Framdriftsplanen er sett opp så oversiktleg og detaljert som det er vurdert å vere realistisk på dette tidspunktet.

• Planprogrammet må innehalde temaet ”kulturminne og kulturmiljø”. Dei rår til at alle automatisk freda kulturminne blir kartfesta, at konsekvensane av kommuneplanen og eventuell utbygging ved kulturminne blir klargjort og at det blir utarbeidd forslag til avbøtande tiltak ved eventuell utbygging.

Vurdering: Temaet ”Kulturminne og kulturmiljø” er tatt med eom eige punkt i planprogrammet. Det er lagt til grunn at kjende automatisk freda kulturminne og vedtaksfreda kulturminne skal visast på plankartet.

• I forhold til punkt 6c – ”Utvikling av næringsareal knytt til satsing på natur, helse og turisme” – peikar fylket på at det er gunstig med planar for tilrettelegging for friluftsliv i forhold til utløysing av statlege tilskott.

Vurdering: Merknaden blir tatt til vitande.

• I forhold til punkt 6f – ”Verneområde og verdsarvområde” – oppfordrar fylket kommunen til å ta omsyn til oppmodingar frå verdsarvstyret og verdsarvrådet, samt harmonisere løysingar med Stranda kommune.

Vurdering: Dette er tatt inn i planprogrammet.

• I forhold til punkt 6g – ”Sjøområda med eller utan næringsareal” – peikar fylket på at plandelen bør omfatta heile sjøarealet i kommunen, og ta omsyn til mellom anna akvakulturanlegg. Denne delen av planen må også harmoniserast med Stranda kommune.

Vurdering: Dette er tatt inn i planprogrammet.

• Fylket vil ha inn Nasjonal turistveg Geiranger-Trollstigen i planprogrammet. Ein må her ta høgde for auka turisttilstrøyming.

Vurdering: Dette er tatt inn i planprogrammet under punkt 6k.

• Barn og unge må inn i planprogrammet. Her er barnetrakkregistrering, helse og oppvekstmiljø, areal for leik og opphald, idrettsanlegg, nærmiljøanlegg og trafikktryggleik viktige punkt.

Vurdering: Barn og unge er tatt inn som eige tema i planprogrammet.

• Universell utforming må inn i planprogrammet. I dette ligg at all planlegging skal vere inkluderande og skal baserast på prinsippet om god tilkomst. Viktige stikkord er bygg og uteområde for alle og friluftsliv for alle.

Vurdering: Universell utforming er tatt inn som eige tema i planprogrammet.

• Samfunnstryggleik og sikring av trygg arealbruk må inn i planprogrammet. I dette ligg vurdering av risiko og sårbarheit før endring av arealbruk og utbygging. Fylket peikar på at i tillegg til eit generelt punkt om risiko og sårbarheit, må det inn i planprogrammet eit punkt som gjeld problematikken kring fjellskredgenerte flodbølgjer spesielt.

Vurdering: Dette er tatt inn i planprogrammet.

• Kommunen bør peike ut ”kjerneområde” i forhold til landbruk, jamfør rettleiaren ”Kjerneområde i landbruk” utgitt av Landbruks- og matdepartementet. Dette bør inn i planprogrammet.

Vurdering: Beiteareal i kommunen skal registrerast og klassifiserast, sjå punkt 7b i planprogrammet. I den samanhengen skal det vurderast å definere kjerneområde for landbruk.

• I forhold til punkt 7c om viltkart viser fylket til tidlegare tilsendte viltkart.

Vurdering: Punktet om viltkart er tatt ut av dei naudsynte utgreiingane.

• I forhold til punkt 7d om utgreiing av behov for bustadtomter (7c i revidert planprogram) oppfordrar fylket til å nytte analysen av lokal byggeskikk, som blei utarbeidd for nokre år sidan.

Vurdering: Dette er tatt inn i planprogrammet.

• I forhold til punkt 7h om trial (7f i revidert planprogram), peikar fylket på at det bør arbeidast for å finne fleire ulike alternativ for lokalisering, då trial gjerne er ein omstridd aktivitet.

Vurdering: Dette er tatt inn i planprogrammet.

Statens vegvesen, brev av 19.03.2007:

• Vegvesenet peikar på at det må takast omsyn til trafikktryggleik, særleg ved skular og bustadområde, og at ein må søke å oppnå ein arealbruk og transportsystem som gir gode totalløysingar i forhold til ressursutnytting, miljø, tryggleik og trafikkavvikling.

Vurdering: Desse forholda skal fangast opp i punkta som gjeld barn og unge, utvikling av kommunesenteret, bustadområde i bygdene, risiko og sårbarheit og god helse.

Noregs vassdrags- og energidirektorat, brev av 08.02.2007:

• Av forhold som gjeld planprogrammet peikar dei på behov for risiko- og sårbarheitsanalyse for naturpåverka faremoment.

Vurdering: Dette er tatt inn i planprogrammet.

Øvre Valldal Utvikling BA, brev datert 26.03.2007:

Peikar på to problemstillingar som går på arealbruk, men som også bør drøftast i forhold til planprogrammet:

• Areal til mikrokraftverk bør vurderast som ein del av kommuneplanen.

Vurdering: Kommunen ser behovet for ein delplan for vassdraga, men har ikkje kapasitet til å gjennomføre dette arbeidet no.

• Øvre Valldal Utvikling BA meiner det bør settast av areal til eit lokalt grovavfallsdeponi i kommunen.

Vurdering: Det er ikkje vurdert behov for ein overordna gjennomgang av avfallshandteringa i kommunen, og dette blir derfor ikkje tatt inn i planprogrammet. Ut frå konkrete innspel om lokalisering kan det likevel vere aktuelt å sette av areal til dette formålet i arealplanen.

Valldal Golfklubb, brev datert 31.05.2005 og 08.06.2005

• Valdal golfklubb ønskjer å få golfbane inn i kommuneplanen i Valldal.

Vurdering: Areal til golfbane vil bli vurdert. Dette er tatt inn i planprogrammet under punkt 6c.

Bergvesenet, brev datert 26.04.2007:

• Bergvesenet rår på generelt grunnlag til at kommunen i samband med rullering av arealplanen tar ein gjennomgang av dei mineralske ressursane, gjer ei vurdering av det lokale behovet for masser til byggeråstoff, og vidare legg til rette for at slike massar kan skaffast lokalt.

Vurdering: Kommunen ser at det ville vere positivt med ei vurdering av dei mineralske ressursane i samband med kommuneplanarbeidet, men har ikkje kapasitet til å gjennomføre dette arbeidet no.

Naturvernforbundet, brev datert 05.06.2007:

• Naturvernforbundet viser til at utbygging av småkraftverk har sett små vassdrag under press. Dei oppmodar kommunen til å utarbeide ein delplan eller liknande for vassdraga sine, slik Rauma kommune har gjort. Naturvernforbundet viser til at det er aktuelt for fylket å utarbeide ein fylkesplan for vassdrag, og meiner at dei kommunane som sjølv utarbeider delplanar vil ha større innflytelse på arealbruken enn om berre fylket skal gjennomføre ein slik plan.

Vurdering: Kommunen ser behovet for ein delplan for vassdraga, men har ikkje kapasitet til å gjennomføre dette arbeidet no.

• Naturvernforbudet peikar på at det i kommunen er registrert verdifulle naturtypar, og nemner mellom anna skogsområde i Onilsafeltet og Lauvvikane med svært høg biologisk verdi og ei rekkje raudlisteartar. Olivinfuruskogen i Onilsafeltet er truleg den sjeldnaste og sterkast trua vegetasjonstypen i Noreg og Europa. Lokalitetane bør vernast, og dette bør med i kommuneplanen.

Vurdering: Naturområde i kommunen vil bli vurdert som ein del av arbeidet med kommuneplanen, mellom anna på grunnlag av utarbeidde rapportar. Dette er tatt inn i planprogrammet sitt punkt 6f.

Stig Holmstrøm

rådmann