NORDDAL KOMMUNE

Arkiv: 151

Saksmappe: 05/00467-26

Dato: 11.06.2006

Møtebok

Revidering av økonomiplan 2006 - 2009

Saksnr. utval	Utval	Møtedato
064/06	Formannskapet	20.06.06
033/06	Kommunestyret	29.06.06

Utsendte saksdokument:

Vedlegg:
1	Budsjettskjema 1A/1B
2	Budsjettskjema 2A/B
3	Investeringsprogram 2006 - 2009

Ikkje utsendte saksdokument:

Vedtatt Økonomiplan 2006 - 2009

Handsaming i Formannskapet 20.06.06:

Signe Brenna, Nl kom med slik endring i økonomiplanen, investering:

1. Vegutbetring Rønnberg/Kilsti 2007 kr. 4 mill.kr

Nærmiljøsenter i Kraftverksbygget 2007 kr. 1 mill.kr

Inndekning: Utleigebygg Djupøyna kr. 5 mill.kr

2. Sentrumsområde Muribugen/Tafjordbadet kr. 250.000,-

Gatelys kr. 150.000,-

Dette beløpet vert heller brukt til vedlikehald av kommunale bygg (herunder reparasjon av ventilasjonsanlegg på rådhuset)

Det vart røysta punktvis:

Pkt. 1: 2 røysta for Brenna sitt forslag som fall

5 røysta for innstillinga

Pkt. 2: Vedtatt mot 1 røyst

Handsaming i Kommunestyret 29.06.06:

Signe Brenna, Nl, kom med slikt forslag:

Revidering av økonomiplan 2006 – 2009 vert utsatt.

Røysting:

2 røysta for Signe Brenna sitt forslag som fall.

18 røysta mot.

Signe Brenna, Nl, kom med slikt nytt forslag:

1. Vegutbetring Rønnberg/Kilsti 2007 kr. 4 mill.kr

Nærmiljøsenter i Kraftverksbygget 2007 kr. 1 mill.kr

Inndekning: Utleigebygg Djupøyna kr. 5 mill.kr

2. Sentrumsområde Muribugen/Tafjordbadet kr. 250.000,-

Gatelys kr. 150.000,-

Dette beløpet vert heller brukt til vedlikehald av kommunale bygg (herunder reparasjon av ventilasjonsanlegg på rådhuset)

3. Restmidlane frå frigjering av det ansvarlege lånet i TK stipulert til om lag 3,2 mill kr

vert brukt til investeringar satt av for 2007 til vann og avløp.

Senterpartiet bad om gruppemøte.

Sp sette fram slikt forslag om nytt pkt. 3:

Kommunestyret tek sikte på å innarbeide midlar i neste økonomiplan til kommunale vegar med dårlegast standard.

Røysting punktvis over forslaget frå Signe Brenna

Pkt. 1: 2 røysta for Brenna sitt forslag som fall.

Pkt. 2: 2 røysta for Brennsa sitt forslag som fall.

Pkt. 3: 3 røysta for Brennsa sitt forslag som fall.

Røysting over forslaget frå Sp:

16 røysta for forslaget frå Sp som vart vedtatt.

4 røysta mot.

Endeleg røysting:

Pkt. 1: Vedtak i samsvar med innstillinga mot 2 røyster

Pkt. 2: Samrøystes i samsvar med innstillinga.

Pkt 3: Vedtak i samsvar med forslaget frå Sp mot 4 røyster.

Saksgrunnlag:

I kommunestyresak PS 05/06 Muriparken, gjorde kommunestyret m.a. følgjande vedtak:

Pkt. 12. Dei økonomiske konsekvensane av ovanståande skal innarbeidast ved rullering av økonomiplan og framlegg av årsbudsjett, og detaljeringa av dei einskilde kostnadsoppsett vert å leggje fram for formannskap/kommunestyre.

Vidare vedtok formannskapet i PS 047/06 Økonomirapport 1. kvartal 2006. Budsjettendringar., følgjande:

1. Kommunestyret vedtek endringar i drifts- og kapitalbudsjett slik det går fram av vedlegga a og b.

Norddal kommune tek i år 2006 opp ytterlegare eit lån på 11 450 000 kr til finansiering av planlagte investeringar. Lånet blir nedbetalt som serielån over 20 år.

2. Endring i kapitalbudsjettet:

Sentrumsområde Muribugen og Tafjordbadet kr. 250.000,-

Gatelys kr. 150.000,-

Finansiert med auka låneopptak.

Regjeringa la 12. mai fram kommuneproposisjonen om lokaldemokrati, velferd og økonomi i kommunesektoren 2007.

Saksopplysningar:

Ovannemnde vedtak og føresetnader er, saman med andre kjente utviklingstrekk og rammevilkår, lagt til grunn for det forslaget til revisjon av økonomiplanen som no ligg føre.

Sjølv om regjeringa legg til grunn ein ytterlegare vekst i kommunesektoren for neste år (om lag 2,5 milliardar), er her lokale føresetnader som må leggjast til grunn, og som ikkje gir positive utslag for kommuneøkonomien. Det viktigaste å nemne her er nedgang i folketalet og endra samansetning av befolkninga, og ein forventa reduksjon i skatteinntekter. (Jfr. sak om budsjettregulering.) På den positive sida kjem auke i eigne inntekter, som eigedomsskatt og auka inntekter på konsesjonskraft.

Dei viktigaste premissane som er lagt til grunn for framlegget til økonomiplan, er følgjande:

Det er tatt utgangspunkt i ein årleg løns- og prisvekst på 3,5% i perioden. Inntekter og utgifter er framskrive med dette utgangspunktet.
Skatteanslaget i årets budsjett synest for høgt, jfr. tidlegare budsjettregulering.
Det er føresett ein svak auke i rentenivået for våre lån, 3,25% i 2007, 3,5% i 2008 og 2009.
10,9 mill. kr. Av ansvarleg lån i Tafjord Kraft er tatt inn i investeringsbudsjettet.
Renteinntekter frå ansvarleg lån i TK og Norddal E-verk er redusert med totalt om lag 1 mill. kr.
Det er gjort mindre avsetningar i budsjettet for 2007 og 2008 med tanke på muleg underskott i 2006.
Avsettingar på VAR-området vert ”nulla ut” i 2009
Det er føresett endringar i skulestruktur
Auken i inntekter på eigedomsskatt og konsesjonskraft er framskrive berre med løns- og prisvekst (3,5%) frå og med 2008

Saksvurdering og konklusjon:

Trass i auka statlege overføringar til kommunesektoren også neste år, er det vanskeleg å sjå nokon vekst i slike overføringar for Norddal kommune sin del, noko som i hovudsak skuldast demografiske tilhøve. Også skatteinntektene synest å ha vore for høgt estimert ved handsaminga av budsjett og økonomiplan i desember –05, og ein bør difor her vise varsemd. Kommunen sitt budsjett vert også pressa av det høge investeringsnivået gjennom fleire år, og dette må ein få ned i åra framover. Det bør ikkje under noko omstende vere høgare enn 10 mill. kr. f.o.m. 2008. Eg nemner her at det vil vere naudsynt med ei vurdering av vassforsyninga i kommunen, med sannsynleg tilhøyrande investeringar. Sjølv om dette er føresett avgiftsfinansiert over tid, inneber det likviditetsmessige belastningar for kommunen som kan vere vanskelege å handtere. Utan denne investeringa, viser interne utrekningar at vi vil ha ei rente- og avdragsbelastning for kommunen på om lag 15 mill. kr. i 2010.

Det som bergar den kommunale økonomien i Norddal, er dei høge eigeninntektene vi har gjennom eigedomsskatt og konsesjonskraft.

Med slike kjente føresetnader er det viktig å arbeide vidare med effektivisering og omstrukturering av drifta, med tanke på innsparingar. Dette må sjølvsagt skje med utgangspunkt i faglege vurderingar og med intesjon om å oppretthalde eller helst auke kvaliteten på tenestetilbodet. Dette må etter rådmannen si vurdering få konsekvensar for vurdering av infrastrukturen innan først og fremst pleie- og omsorgssektoren og skulesektoren. Som ein følgje av dette er det i økonomiplanen lagt inn som eitt av balanseringstiltaka at Tafjord skule vert nedlagt frå hausten 2007. Dette kan ein sjølvsagt ikkje vedta eksplisitt i ei sak om økonomiplanen. I staden bør ein i etterkant få fram ei eiga sak som nettopp vurderer dei faglege aspekta, målt opp mot kvalitet – og økonomi. Også innan pleie- og omsorgssektoren er det i balanseringsforslaget lagt til grunn omstruktureringar som må vurderast nærmare, m.a. samordning av tiltak for funksjonshemma.

Stig Holmstrøm
rådmann