NORDDAL KOMMUNE

Arkiv: L12

Saksmappe: 05/00602-18

Dato: 08.06.2006

Møtebok

Reguleringsplan Vikaberga – 1. gongs handsaming

Saksnr. utval	Utval	Møtedato
041/06	Det faste utvalet for plansaker	20.06.06

Utsendte saksdokument:

Fiskeridirektoratet, merknad dat. 09.05.06

Statens vegvesen, merknad dagsett 26.05.06

Møre og Romsdal fylke, fråsegn/motsegn av 02.06.06

Reguleringsplankart, M= 1: 1000

Reguleringsføresegner §§ 1-4, dagsett 08.04.06

Ikkje utsendte saksdokument:

Annonsetekst – offentleg ettersyn til 03.06.06

Brev til partane dat. 02.05.06 vedk. offentleg ettersyn

Brev frå MD av 09.05.06 til kommunen vedk. beredskap

Sak 027/06, møte 24.04.06 i Det faste utvalet for plansaker

Privat forslag til reg.plan Vikaberga, brev dat. 11.04.06

Plansituasjon med innkomne merknader, dat. 08.04.06

Planbeskrivelse dagsett 08.04.06

Brev frå Miljødepartementet av 02.02.2004 vedk. motsegn

Landskapsanalyse frå Aurland Naturverkstad BA av juli 2005 (Rapport nr. 3-2005)

Referat frå møte 03.06.05 mellom fylket, grunneigar og kommunen

Annonse om oppstart av reguleringsarbeid (merknadsfrist 16.09.05)

Brev frå Anne Inger og Kåre Strøm dat. 15.08.05 vedk. oppstart av regulering

Kartutsnitt, M= 1: 5000, som syner avgrensing av planområde

Brev frå Kystverket av 05.09.05, førehandsuttale

Brev frå Statens vegvesen dat. 08.09.05 vedk. avkøyrsle

Fråsegn, Møre og Romsdal fylke, dagsett 10.09.05

Uttale etter synfaring, Møre og Romsdal fylke, kulturavd., dat. 21.12.05

Merknad av 10.09.05 frå adv. Olav V. Myklebust (Jon Ole Viken)

Gjeldande kommuneplanen, arealdelen

Delplan for Fjørå, arealdelen

Saksgrunnlag:

I møte den 24.04.06, sak 027/06, gjorde Det faste utvalet for plansaker slikt vedtak:

Det faste utvalet for plansaker har vurdert privat forslag til reguleringsplan for VIKABERGA, og vil fremme forslaget som offentleg plansak.

I samsvar med § 27-1 i Plan- og bygningslova vedtek Det faste utvalet for plansaker å legge forslaget til reguleringsplan for VIKABERGA ut til offentleg ettersyn i 30 dagar (26.04.-26.05.06) i samsvar med kart og føresegner dagsett 08.04.06 med følgjande justering:

1. Planområdet vert å utvide til også å femne om eksisterande campingområdet/turistområde på

gnr. 28, bnr. 2.

2. Planområdet vert også å utvide til å femne om sjøarealet rundt Vikaberga i samsvar med kommuneplanen (NFFF-område).

Saksopplysningar:

På vanleg måte ved annonsering i Sunnmørsposten og Storfjordnytt og ved brev til partane, har forslaget til reguleringsplan m/føresegner for VIKABERGA lege ute til offentleg ettersyn ein månad og fram til 03.06.06. Perioden for ettersyn i saka vart administrativt endra med ei veke fram til 03.06.06 av praktiske omsyn ved annonsering mv.

Det er kome 3 merknader i saka.

Merknad 1. Fiskeridirektoratet region Møre og Romsdal

I merknaden vert det lagt til grunn at reguleringa ikkje legg opp til aktivitetar som er til hinder eller ulempe for sjøverts trafikk og fiskerinæringa sine interesser i området.

Direktoratet minner om at i strandsona tett inn til den foreslegne reguleringsgrensa i aust, ligg to godkjente lokalitetar for akvakultur. Det vert lagt til grunn at fritidsaktiviteten vert samordna i forståing med fiskerinæringa sine interesser og ikkje utviklar seg til å hindre eller fortrenge fiskeoppdrett og verksemder som er knytt til drift av slike anlegg.

Merknad 2. Statens vegvesen

Vegvesenet viser til at tilkomsten for Vikaberga er lagt lengre vekk frå tunnelmunninga og har ingen merknad til planframlegget.

Merknad 3. Møre og Romsdal fylke

Fylket har ingen vesentleg merknad til planavgrensinga, men registrerar at område F7 strekkjer seg noko lengre mot nordvest enn kartutsnittet ved oppstart. Det må diskuterast om det er naudsynt med bebyggelsesplan for dette området.

Vidare har fylket ingen merknader til utforminga av den delen av planforslaget som ligg nord for den langsmale ryggen som strekkjer seg over heile Vikaberga.

Fylket har merknad til delområda 2 og 3 (jfr. landskapsanalysen frå Aurland Naturverkstad BA). Planforslaget viser her tre område for fritidsbebyggelse og eitt område for sjøbu/naust. Desse områda ligg etter fylket sitt syn svært eksponert mot fjorden. Terrenginngrep og bygging her vil derfor bli svært synleg. Det vert vurdert til at utbygging her ikkje vil vere i samsvar med retningslinene frå Miljøverndepartementet (MD). Fylket har motsegn til planforslaget på dette punktet.

Når det gjeld samfunnstryggleiken ligg Vika utsett for flodbølgjer etter moglege fjellskred frå Hegguraksla og Åkneset. I følgje Åknes/Tafjord-prosjektet, vil flodbølgjer frå Hegguraksla dimensjonere faresona for flodbølgjer med sannsyn større enn 1/1000 pr. år i dette området. Elles er det lagt til grunn at skred frå Hegguraksla gir faresone tilsvarande utbreiing av flodbølgjene i 1934. I Vika nådde bølgjene i 1934 opp til kote 11 – som dermed utgjer grensa for farenivået 1/1000 pr. år (klasse 2). For denne reguleringsplanen legg fylket til grunn at ”områder for fritidsbebyggelse” og ”område for sjøbu, naust” kjem i klasse 2.

Fylkesmannen har på prinsipielt grunnlagt spurt MD om i kva grad det kan setjast vilkår for beredskap i samband med plangodkjenning. Fylket forstår MD slik at dagens lov opnar for dette (Brev frå MD av 09.05.2006). Det vert vurdert til å vere ein føresetnad at ein i føresegnene til reguleringsplanen stiller krav om at beredskap må vere på plass før utbygging.

Beredskap og samfunnstryggleik ligg under fylkesmannen sitt ansvarsområde. Før vilkår om beredskapstiltak mot flodbølgjer er fastsett, fremmar fylket på vegne av fylkesmannen motsegn til den del av reguleringsplanen som ligg under kote 11, og som gjeld ”fritidsbebyggelse” og ”sjøbu/naust”.

Saksvurdering og konklusjon:

I denne saka fell det naturleg å ta fram at Miljøverndepartementet sitt vedtak i brev dagsett 02. februar 2004 til Fylkesmannen i Møre og Romsdal vedkomande motsegn til Norddal kommune sin arealdel av kommuneplanen for åra 2002-2014. Vedtaket lyder slik:

I medhald av § 20-5 femte ledd i plan- og bygningsloven av 14. juni 1985 godkjenner Miljøverndepartementet Norddal kommunestyre sitt vedtak i møte den 27. juni 2002 om at det i kommuneplan for Norddal 2002-2014 opnast opp for bygging av nye fritidsbygg ved Vikaberget i Fjørå. Områda mot vest, på toppen av sjølve Vikaberget og i skråninga mot sør skal det skjermast for utbygging. Utbygginga av området kan ikkje skje før det er utarbeidd reguleringsplan. Det er i dette brev gitt føringar for innhaldet i reguleringsplanen.

I MD sitt brev av 02.02.04 under Miljøverndepartementet si vurdering (side 4, tredje avsnitt) finn ein følgjande formulering:

Etter ei samla vurdering har departementet difor funne at det er grunnlag for å godkjenne at det opnast for ei mindre utbygging på nordsida av Vikaberget, i bakkant av sjølve høgdedraget, og ei avgrensa utvikling av reiselivsanlegg mot aust og søraust. Departementet meiner og at det aust i området og søraust mot Vikaneset, der berget er lågt, kan det opnast for bygging av reiselivsanlegg med rorbuer, naust og brygge. Departementet føreset at utbygginga ikkje kjem i konflikt med intensjonane i høve strandsona eller vil vere til hinder for allmenta. Det bør elles ikkje byggjast i strandlinja.

I same brev på side 4, fjerde avsnitt finn ein følgjande formulering:

Departementet føreset at kommunen arbeider for å finne løysingar som legg til rette for utvikling av reiseliv, turistnæring, kommunale behov og allmenne samfunnsinteresser, og at ei utbygging ikkje vert unødig arealkrevjande eller dominerande i landskapet. Kommunen bør i samråd med grunneigarane og fylkesmannen etablere eit tilbod som er attraktivt for eit bredt publikum. Ei eventuell drøfting og avgjer om vidare utbygging i området bør takast i planprosessen i samband med utarbeiding av ein reguleringsplan.

Det må vere lov å uttrykke at det som departementet skriv i sitt vedtak ikkje direkte harmonerar med det som er skrive i saka si vurdering, og det vert såleis gjenstand for ein grad av tolkning. Fylket tolkar tydlegvis bokstavleg det som MD skriv i sitt vedtaket: ”Områda mot vest, på toppen av sjølve Vikaberget og i skråninga mot sør skal det skjemast for utbygging”.

Det står i departementet si vurdering:

”Departementet meiner og at det aust i området og søraust mot Vikaneset, der berget er lågt, kan det opnast for bygging av reiselivsanlegg med rorbuer, naust og brygge”.

Det som i saka må vurderast er om det sydvendte arealet i reguleringsplanframlegget for sjøbu/naust er strid med MD sitt vedtak.

Når det gjeld områda F1, F2 og F3, områder for fritidsbygg, som ligg på ”flata” over skråninga mot syd og under toppen av Vikaberget, så finn ein dette i departementet si vurdering (side 3, siste avsnitt og vidare på side 4):

”Miljødepartementet meiner at ei eksponert utbygging på toppen av Vikaberget, på høgdedragets retning aust-vest, er utelukka. Det vil føre til uheldig reliefverknad og eksponering frå fleire hald. Her vil eit brot i vegetasjonsbeltet verte svært synleg. Også ei utbygging i den brattlendte skråninga mot sør vil føre med seg markant og skjemmande landskapsendringar. I tillegg vil ei slik utbygging gjere området mindre tilgjengeleg for andre brukarar. Departementet meiner at den innlagte avstanden på 20 meter frå sjøen ikkje vil vere tilstrekkeleg til å unngå dette.

Departementet meiner likevel at ei avgrensa utbygging i deler av området, tilpassa terrenget, med vekt på skånsame inngrep – også i anleggsfasen- må kunne aksepterast. Utbygginga må skje utan at allmentas interesser vert satt til side. Inngjering av tomter må ikkje skje”.

Arbeidet med beredskap og samfunnstryggleik ligg under fylkesmannen sitt ansvarsområde. Før vilkår om beredskapstiltak mot flodbølgjer er fastsett, fremmar fylket på vegne av fylkesmannen motsegn til den del av reguleringsplanen som ligg under kote 11, og som gjeld ”fritidsbebyggelse” og ”sjøbu/naust”.

I samsvar med brevet frå Miljødepartementet av 09.05.2006 vert det vurdert frå fylket si side til å vere ein føresetnad at ein i føresegnene til reguleringsplanen stiller krav om at beredskap må vere på plass før utbygging.

Ein finn det naturleg utifrå dei opplysningar ein sit inne med i høve flogbølgjeproblematikken i området vårt, at reguleringsplanen vert endra slik at byggeareala som ligg under kote 11 vert liggande som areal som først kan byggast når det er på plass godkjent beredskap for området.

Ein rår til at reguleringsføresegnene tek opp i seg kravet til beredskap og at plankartet får ei klar markering av kote 11.

Kommunen har gjennom den prosessen som har vore med motsegna til arealdelen av kommuneplanen for området Vikaberga, teke til orde for ei fleirbruksløysing for delar av utbyggingsområdet, der kommunen i samråd med grunneigar og fylkesmannen søkjer å etablere eit anlegg som er retta mot eit breitt publikum. Eit slikt anlegg vil kunne vere med på å dekke kommunale behov innanfor mellom anna helse-, sosial- og utdanningssektoren, samstundes som det vil vere ein attraksjon for turistar og andre, og inneber ei forsvarleg strandsoneforvaltning. Det vart nemnt at eventuelle vidare drøftingar og avgjerder om detaljane for utbygging og bruk bør takast i planprosessen i samband med utarbeiding av ein reguleringsplan.

I det forslag til reguleringsplan for Vikaberga som ligg føre kan ein ikkje klart sjå at det ligg føre vurderingar i planframlegget som vedkjem eit breitt publikum i samsvar med dei føringar som var gjevne. Det føreliggande forslag til reguleringsplanføresegner kan ein heller ikkje sjå nemner spesifikke tiltak i området som vedkjem ålmenta.

Ein rår til at det i reguleringsføresegnene vert innarbeidd at det kan tilrettelegast for ålment bruk til dømes fiskeplassar (små brygger), landfeste for fritidsbåt mv.

Eit alternativ for at reguleringsarbeidet skal kome vidare no, kan vere å ta av planen området det er disens om, områda F1, F2 og F3 for fritidshus samt område for sjøbu, naust på sydsida av Vikaberget.

Dette er ingen ideell arbeidsmetode, men i høve den næringsdrivande kan dette vere ein fordel og så arbeider ein med dei to reguleringsplandelane parallelt. Ein kan då få betre med i prosessen dei tilhøve som var nemnt som gjeld ålmenta i området.

Det må vere naturleg utifrå det som ligg føre i saka samt fråsegna/motsegna datert 02.06.06 frå fylket at det vert gjennomført mekling med Fylkesmannen før reguleringsplanen vert lagt fram for kommunestyret til vedtak.

Stig Holmstrøm
Rådmann