NORDDAL KOMMUNE

Arkiv: 2/24 Saksmappe: 07/00094-2 Sakshandsamar: Lars Kjell Smoge Dato: 30.05.07

Møtebok

Søknad om disp. - Tak over uteplass gnr. 2, bnr. 24 - Nils Helge Aarseth

Saksnr. utval	Utval	Møtedato
032/07	Det faste utvalet for plansaker	06.06.07

Utsendte saksdokument:

Situasjonskart, M=1:1000

Teikning av planlagt takoverbygg

Ikkje utsendte saksdokument:

Søknad om dispensasjon dat. 22.01.07 (skjema)

Kvittering for nabovarsel av 22.01.07

Sak 041/03 i Det faste utvalet for plansaker, møte 19.08.03

Sak 033/03 i Det faste utvalet for plansaker, møte 19.08.03

Reguleringsføresegnene for Lingås Hyttegrend

Endring av reguleringsføresegnene til BYA 100 m2 (endra frå 60 m2), sak 48/02, møte 17.09.02

Reguleringsplanen Lingås Hyttegrend

Hyttemelding, vedteke av k-styret 03.07.03

Rådmannen si innstilling:

Søknaden om dispensasjon dat. 22.01.07 om auka areal utover vedteke for reguleringsplanen Lingås Hyttegrend m/føresegner og dispensasjon frå denne til 112,5 m² BYA, vert ikkje imøtekomen.

Det faste utvalet for plansaker viser til vedteken Hyttemelding (k-styret 03.07.03), der storleiken på hyttene skal vurderast for kvart planforslag.

Handsaming i Det faste utvalet for plansaker 06.06.07:

Forslag frå Svein Linge:

Søknaden om dispensasjon dat. 22.01.07 om auka areal utover vedteke for reguleringsplanen Lingås Hyttegrend m/føresegner og dispensasjon frå denne til 112,5 m² BYA, vert imøtekomen.

Forslag frå Arne Sandnes til pkt. 2:

Nye reguleringsføresegner for Lingås hyttegrend blir lagt fram snarast.

Røysting:

Vedtak samrøystes i samsvar med forslaga frå Svein Linge og Arne Sandnes.

Vedtak i Det faste utvalet for plansaker - 06.06.07:

1. Søknaden om dispensasjon dat. 22.01.07 om auka areal utover vedteke for reguleringsplanen Lingås Hyttegrend m/føresegner og dispensasjon frå denne til 112,5 m² BYA, vert imøtekomen.

2. Nye reguleringsføresegner for Lingås hyttegrend blir lagt fram snarast.

Saksgrunnlag:

Søknaden gjeld planar for bygging av overbygd frittståande uteplass på 27,1 m² på gnr. 2, bnr. 24 i Lingås Hyttegrend; dette inneber at må gjevast dispensasjon frå reguleringsplanen.

Saksopplysningar:

I sak 048/02 i Det faste utvalet for plansaker vart reguleringsføresegnene for Lingås Hyttegrend vedtekne endra frå 60 m2 til BYA 100 m2.

For eigedomen vart det i sak 041/03 (etter klage) gjeve dispensasjon for bygging av hytte på 112,5 m² BYA.

Tomten har eit areal på 657,5 m² og vil med eit utbygging på 112,5 m² + 27,1 m²= 139,6 m² få ein utnyttingsgrad på 21, 2 %.

Etter § 7 i Plan- og bygningslova kan Det faste utvalet for plansaker når særlege grunnar ligg føre, gje dispensasjon frå reguleringsplan.

I søknaden om dispensasjon som ligg føre, er det ikkje oppgjeven nokon spesiell grunn for at det er ynskjeleg å ha ein frittståande overbygd uteplass i tillegg til hytta.

På nabovarsel ligg ikkje føre merknader.

Saksvurdering og konklusjon:

Det er kommunestyret som vedtek reguleringsplanar etter tilråding frå Det faste utvalet for plansaker; slik også for reguleringa av Lingås Hyttegrend (vedteke 19.09.02).

Det faste utvalet er sett til å forvalte Plan- og bygningslova sine reglar, derimellom å kunne gje dispensasjonar frå reguleringsplan når ”særlege grunnar” ligg føre; når ”særlege grunnar” ikkje ligg føre har heller ikkje utvalet heimel til å kunne gje dispensasjon.

Hyttemeldinga som kommunestyret vedtok i juli 2003 er politiske signal for hyttebygging i kommunen. Den har i alle høve ingen formell verknad på eksisterande disposisjons- og reguleringsplanar. Hyttemeldinga seier at storleiken på hyttene skal vurderast for kvart planforslag.

I denne saka er ein rimeleg klar på at dei ”særlege grunnar” ein dispensasjon etter § 7 i PBL krev ikkje er tilstades, og såleis har ikkje utvalet heimel til å kunne gje dispensasjon.

Utnyttingsgraden av tomten vil etter eventuell utbygging verte på i overkant av 21 %, noko som er over dei normer som er gjeve for slike reguleringsplanar.

Som ein konsekvens av den vedtekne Hyttemeldinga, kan kanskje Det faste utvalet for plansaker ta opp til omregulering (jfr. § 28-1 i PBL) eksisterande hyttefelt, for gjennom reguleringsprosessen vurdere om det ligg til rette for at storleiken på hyttene kan aukast utover det som er vedteke.

Det synest i så fall naturleg at alle eksisterande hyttefelt vart vurdert i denne samanhengen. Her er nemleg eit press også frå hytteigarar i felta med arealgrense på 50 - 60 m2 om å kunne bygge på, bygge anneks m.v.

Det vert eit ganske omfattande arbeid å starta att regulering i alle dei vedteke hyttefelta, men det må verte opp til politikken sjølv å finne ut av om Hyttemeldinga primært berre er meint å vere eit styringsredskap framover eller ikkje.

Det er høve for private å kome med reguleringsplanforslag (jfr. § 30 i PBL).

Vedtaket i denne saka kan klagast på etter dei vanlege reglane i Forvaltningslova.

Utvalet bør kanskje foreta ei synfaring i saka.

Stig Holmstrøm

Rådmann