Norddal kommune tek imot tilbodet for delegering av
forvaltningsmynde for Reinheimen nasjonalpark, Tafjorden landskapsvernområde og
Trollstigen landskapsvernområde, og inngår avtale med DN om delegering som
oversendt frå DN i brev dagsett 13.03.07.
Norddal kommune er ikkje nøgd med dei økonomiske vilkåra, og
vil arbeide for at desse blir endra til det betre.
Saksgrunnlag:
Norddal kommune har frå DN motteke tilbod om
forvaltningsmynde for verneområda oppretta i samband med Verneplan for
Reinheimen: For Norddal kommune vil dette gjelde
Reinheimen nasjonalpark
Tafjorden landskapsvernområde
Trollstigen landskapsvernområde
Overføring av forvaltningsmynde er eit viktig ledd i
arbeidet med å sikre lokalt engasjement og forståing for verneplanarbeidet.
Saksopplysningar:
Forvaltningsmodellen
bygger på at kvar kommune forvaltar sine areal innanfor det enkelte verneområde,
etter gjeldande verneforskrift. I tillegg skal det opprettast eit rådgjevande
samarbeidsorgan, som i praksis vil bli ei vidareføring av det eksisterande
”Kontaktutvalget for Reinheimen” (KUR). Så langt er det tenkt at sekretariatet
og leiinga av KUR vil gå på omgang mellom kommunane, men dette er enno til
vurdering.
Vidare
skal det utarbeidast ein forvaltningsplan, som vil bli eit felles
styringsdokument for verneområda. Forvaltningsplanen skal utarbeidast av
kommunane og godkjennast av DN.
Overordna
ansvar for oppsyn i verneområda ligg til SNO etter Lov om statens naturoppsyn.
Vedlagt
saka følgjer utkast til avtale om delegasjon mellom kommunen og Direktoratet
for naturforvaltning (DN).
Tidsrommet
for delegasjonen skal følge dei 4 forsøka som er i gang i regi av Direktoratet
for naturforvaltning, med lokal forvaltning av verneområde. Og det er
sagt frå Miljøverndepartementet at forvaltninga av Reinheimen nasjonalpark med
tilhøyrande landskapsvernområde skal vurderast saman med desse, men ikkje gjennomgå
ei full evaluering på line med dei andre lokale forsøksordningane.
DN reknar med at budsjettet for inneverande år gjer det
mogleg å overføre eit beløp frå kr 600.000,- til 800.000,- til forvaltning av
Reinheimen. Kommunane må vere klar over at framtidige budsjettløyvingar kan
vere usikre, og at kommunane må ta sin del av kostnadene.
Saka vart handsama i Norddal formannskap i møte den
23.04.07, sak 056/07. Saka vart utsett på grunn av dei usikre økonomiske
rammene ein hadde fått tildelt, og den reaksjonen dette hadde ført til i dei
andre berørte kommunane.
Saksvurdering og konklusjon:
Rådmannen
viser til at tilbodet frå DN kjem som ei følgje av KUR og kommunen sitt innspel
i verneplanprosessen. Tilbodet frå DN er eit resultat av at kommunane har fått gjennomslag
for at dei aktuelle verneområda skal ha ei lokal forvaltning, og at DN er
viljug til å prøve ut den forvaltningsmodellen som kommunane sjølv gjorde
framlegg om.
Utkast
til avtale oversendt frå DN har alminnelege vilkår som byggjer på verneforskrifta
og gjeldande forvaltningsskikk.
Sidan det
er tale om utøving av offentleg mynde er det ikkje rett å opprette
partssamansette utval. Forvaltninga i kommunen må byggje på den gjeldane
organiseringa i kommunen, slik at for Norddal kommune sine del vil vera
formannskapet som vil behandle saker etter delegeringa, eventuelt med vidare
delegasjon til rådmannen i enkle saker. Utkast til forvaltningsplan skal
likevel leggjast fram for kommunestyret til uttale.
Kommunene innanfor verneplanområda må tilførast
fagkompetanse i samband med dei ulike forvaltningsoppgåvene ein no skal ta
ansvar for. For Norddal sin del er det viktig med mest mogleg statleg og
fylkeskommunal finansiering når finansieringa skal på plass.
…………………………………………………..
Nye saksopplysningar til
formannskapsmøtet 06.06.07:
I tilbodet frå DN står det at det er mogleg å overføre eit
beløp i år på mellom kr 600.000,- og
kr 800.000,- til forvaltning av verneområda. Dette er små
budsjettrammer for dei oppgåvene som skal løysast. Det vert også opplyst at
framtidige budsjettrammer er usikre.
Dersom Norddal kommune skal overta forvaltninga av
Reinheimen, vil den økonomiske sida vere avgjerande. Slik det går fram av
tilbodet frå DN, vil ein heller ikkje kunne foreta ei langsiktig forsvarleg
forvaltning med usikre framtidige løyvingar.
Med bakgrunn i dette kan Norddal kommune ikkje godkjenne
tilbodet om delegering av forvaltningsmynde på dei vilkåra som ligg føre i dag.
I den vidare prosessen er det viktig at kommunane kan opptre samla ovanfor DN
og andre aktuelle organ. Det er viktig å skape eit tilfredsstillande økonomisk
grunnlag for forvaltninga av Reinheimen.
På grunn av desse
opplysningane legg rådmannen fram slik ny innstilling til møtet 06.06.07:
1.
Norddal kommune aksepterer ikkje vilkåra for delegering av
forvaltningsmynde for Reinheimen nasjonalpark, Tafjorden landskapsvernområde og
Trollstigen landskapsvernområde. Grunngjevinga er at dei økonomiske rammene som
er lagt fram er for små og usikre. Dette vil ikkje danne noko godt grunnlag for
god lokal forvaltning.
2.
Kommunane som ikkje ynskjer delegering av forvaltningsmynde
no, bør samla ovanfor DN og andre aktuelle organ kome fram til eit betre
økonomisk fundament før ein tek på seg denne viktige forvaltningsoppgåva.
