Saksgrunnlag:
Oppstart av arbeidet med reguleringsplan for området var kunngjort
ved annonse og ved brev til planstyresmakt stat/fylke og grunneigarane. Det var då og kunngjort at ein hadde til
hensikt å legge ned bygge- og deleforbod.
Frist for å kome med merknad var sett til 04.april 2006. Det er kome 4 merknader til oppstart av
reguleringsarbeidet og nedlegging av bygge- og deleforbod.
Saksopplysningar:
Merknad 1. Statens vegvesen
Merknaden gjeld området sør for riksvegen.
Det blir peika på at det vil ein vere ein føremun om talet
på avkøyrsler frå planområdet til riksvegen blir redusert. Det blir vidare bedt om at det vert lagt inn
eit gang- sykkelvegsystem innanfor planområdet slik at gangtrafikk til sentrum
ikkje treng å krysse riksvegen.
Kommentar
Det er i dag 4 regulerte avkøyrsler til område sør for
riksvegene. Lengst ute er det til
badeplassen i Muribugen, så eiga avkørsle til Muritunet, felles avkøyrsle til
bensinstasjonen og næringshagen og til slutt hovudavkøyrsle til området. Ein ser det som vanskeleg å fjerne nokon av
desse.
Eit gangvegnett for området vil vere ein primær oppgåve både
som internt gangareal, men og med tilknyting inn til Sylte og til turveg opp
langs Valldøla.
Merknad 2. Valldal Automaskin
Tomt var tildelt i 1977 til verkstad og med atterhald om at
det og skulle vere bensinstasjon.
Verksemda starta opp i 1979 og driv i dag bil- og traktorverkstad samt
bensinstasjon på eiga tomt.
Ei omregulering i tråd med kommunetyret sitt vedtak vil får
store konsekvensar for verksemda, og også for Remseth maskin som leiger
areal. Denne verksemda ligg i startgropa
til å bli noko stort, men må vise resultat dei 2 næraste åra.
Verksemda er bygt opp gradvis til å vere kva det er no med
bilverkstad, traktorsal og –service, Stihlbutikk og bensinstasjon for eit stort
omland. Remseth Maskin overtok
traktordelen frå 2004 og leiger lokale.
Dette er yngre krefter som flytter heim til Valldal. I løpet av 1 år er dette blitt til 3 mann
som dekker området Nordfjord – Romsdalsfjord med sal og service. Det har vore arbeidd kontinuerleg med
samarbeidsformer, eigarstruktur og tilrettelegging for utvida drift, og hausten
2005 var det klart for å ville bygge verkstadhall og kontor/salslokale for
Remseth Maskin med 260 m2 og nye sanitæranlegg for Valldal Automaskin med 100
m2. Totalt bebygd areal vil vere 750
m2.
På tomta kring bygget vil kontorbrakkene bli fjerna når
nybygg er ferdig, den kommunale tømestasjonen for bubilar blir flytta, kommunal
løysing på deponering av spesialavfall må kome. Det blir nok oppstillingsplassar for bilar og traktorar. Det er søkt om å få kjøpe det kommunale
arealet mellom bensinstasjonen og riksvegen.
Det blir bedt om eit snarleg skriftleg svar frå kommunen
korleis ein ser på deira utvikling på Murigandane. Vedlikehald er blitt utsett i påvente av nybygg.
Det er vist til kontakten som har vore med kommunen og at
initiativ til å få fram opplysningar har kome frå dei sjølve. Dei oppfattar seg ikkje velkomne til å vere
på staden og oppfattar det og slik at det ikkje er politikarane og kommunen som
bestemmer. Men det blir vist til at det
er ein eigen eigedom det gjeld med 2 verksemder, og kommunen vil bli halde
ansvarleg for økonomiske ulemper av dette.
Det er ikkje gitt kommunal støtte til Valldal Automaskin og
litt til Remseth Maskin. Dette er unge
etablerarar som slår seg ned i Valldal og skape eigne arbeidsplassar utan
økonomisk hjelp frå kommunen.
Det vert kravt at alle planar kommunen måtte ha for
eigedomen og verksemdene skal drøftast med dei, og det blir og forventa at
andre som har planar som berører dei, og tek kontakt direkte til dei som
grunneigar og bedriftseigarar. Blir det
lagt ned bygge- og deleforbod, må kommunen gå i konkrete drøftingar med Valldal
Automaskin og Remseth Maskin om kva økonomiske konsekvensar det vil få.
Merknaden er vedlagt kart som syner påbyggingane.
Kommentar
Merknaden gir eit godt inntrykk av bedriftsetableringa og
kva den etter kvart har utvikla seg til.
Ein får inntrykk av ei solid verksemd med eit godt potensiale i eit vidt
marked. Kjernespørsmålet er om dette er
eit føremål og ei verksemd som vil vere i samsvar med kommunestyret sine
intensjonar med området. Vidare om
arealet på lengre sikt vil dekke behova for ei ekspansiv verksemd.
I administrasjonen har vi hatt møte med Valldal Automaskin
og Remseth Maskin. Frå dei var det gitt
uttrykk for at eksisterande lokalisering var å foretrekke fordi der var det
meste investert i bygget frå før, det var ein salsfremjande stad og ein var
godt etablert og kjent her. Kommunen
har teke opp om om utområdet ved Valldal trevarefabrikk kunne vere
alternativ. Det var ikkje interessant,
spesielt ut i frå at alle investeringar måtte gjerast på nytt. Ut i frå kartet er det neppe skikka heller
sidan det er berre halve arealet av kva Vallldal Automaskin har i dag, og
framtida for industri kan vere like usikker her. Djupøyna skal vere det nye industriområdet i Valldal, og
opparbeiding av dette ligg i pakken for Muriparken. Men det var heller ikkje sett på som aktuelt ut i frå nye store
investeringar og at det var vekk frå hovudferdselsåra inn og ut av
kommunen. Ein såg og synergieffekt med
samlokalisering med bensinstasjonen.
Administrasjonen har og hatt møte med Berg/Jacobsen-gruppen
og Muritunet. Dette spørsmålet var
drøfta konkret sidan det var nemnt i eit tidlegare brev dei hadde skrive på
oppmoding frå kommunen om å kome med innspel.
Ut i frå det samspelet desse to verksemdene legg opp til (Muritunet og
nytt hotell) ville ei regulering med berre føremål service vere det rette for
heile området. Men tre andre verksemder
er der alt. I eit brev sendt etterpå
blir det gitt uttrykk for at ei påbygging og innandørs bruk for verkstad vil
vere akseptabelt i høve til øvrige planar, men ikkje oppstilling og utstilling
av traktorar og reiskap. Det kunne t.d.
vere på området til Valldal trevarefabrikk.
Gjennomføring av bygge- og deleforbod blir teke opp som eit
eige punkt i saka.
Merknad 3. Møre og Romsdal fylke
Det er vist til naustområdet, og det er viktig å ta omsyn
til kulturmiljøet i planen. SEFRAK-reg.
for bygga er lagt ved.
Det er teke med universell utforming som er eit omgrep om
likt tilgjenge for alle. Dette bør ein
få med i planen.
Det er vist til mogleg flodbølgje frå Åknes/Heggurda der
området ligg innanfor fåresona.
Utbygging må skje innanfor teknisk forskrift sine krav til
tryggleik. Nye sannsynlegheitestimat
for hending og bølgjeanalyse vil gje grunnlag for korleis området kan bli
påverka. Dette skal ligge føre i løpet
av april. Vilkår for korleis dette kan
avklarast i planføresegnene bør
avklarast med sentrale planstyresmakter.
Dette bør og vere samordna med alle berørte kommunar langs Storfjorden.
Kommentar
Naustområdet er alt med som eige område i gjeldande
reguleringsplan, og blir truleg uendra slik.
Universell utforming burde vere mogleg å gjennomføre i eit
område som er så godt arrondert som dette.
Ein føresetnad er at gangtrafikken og tilgjenge elles blir eit av dei
første planelementa som blir sett på plass og som føresetnad for utnyttinga
elles.
Arbeidet med byggeforskrifter i høve til fjellskred og
flodbølgjer er eit fylkesprosjekt som skal vere ferdig i 2010. Ein håper likevel å kunne få til viktige
avklaringar før sommerferien med omsyn til om beredskap reduserer
personrisikoen og med omsyn til materiell skade. Det er sett ned ei administrativ gruppe mellom dei 4 næraste
kommunane i samarbeidd med fagpersonar i fylket som skal sette dette i praktisk
samanheng. Her er ein samde om å ha ei
felles haldning i kommunane. I følge
notat frå fylket bør det ikkje gjevast byggeløyve i området så lenge sak om
faregrenser er under utgreiing. Når dette
no er kjent, kan det ved gitt byggeløyve, bringe kommunane i
erstatningsansvar. Det gjeld og for ny
bygging etter gjeldande planar, men det er uklart om det vil gjelde ved påbygg. Dette er då ikkje bygge- og deleforbod etter
§ 33 som blir lagt ned for å lage reguleringsplan. Det er det generelle tryggleikskravet etter § 68 der plikt til å
påsjå dette er lagt til planutvalet i plansaker og til driftsutvalet i konkrete
byggesaker.
Arbeidsgruppe 1, kartlegging og overvaking, i
fjellskredprosjektet er ikkje kopla inn i dette.
Merknad 4. Valldal Bowlingsenter AS
Merknaden ligg føre i to brev.
a.
Merknaden er først ei orientering om planane vidare. Det blir bedt om ei stadfesting på ei
oppfatning om at Valldal Bowlingsenter ikkje er omfatta av vedtaket om bygge-
og deleforbod ettersom aktiviteten er service.
Etter halvt års drift ser ein at
verksemda har ei framtid, og ein vil realisere dei planane ein har for vidare
utvikling av området. Det er påbygg,
endring av fasade, maling utbetring av parkering og tilkomstveg. Dersom dette er omfatta av vedtak om bygge-
og deleforbod, er skrivet å sjå på som ein søknad om unnatak.
b.
Det blir bedt om svar frå kommunen om verknader for Kula si
utvikling med eit bygge- og deleforbod.
Dette gjeld planar som kan bli realisert innan to år_
-
bygge større parkeringsplass, asfaltere denne og tilkomstvegen
-
lydisolere og bordkle vegg mot nabo mot vest
-
bygge på 20 m2 mot aust med kjølerom, fryserom, lager,
varemottak
-
bygge på 150 m2 i to etasjer på baksida til danselokale etc.
Kommentar
Lova set opp ei slik føresetnad for dispensasjon frå bygge-
og deleforbod slik: Det faste utvalet for plansaker kan samtykke i at eit
arbeid blir utført dersom det etter utvalet sitt skjønn ikkje vanskeleggjer den
nye regulering.
Ein vil oppfatte dette slik at ein dispensasjon ikkje kan
bli gitt generelt for ei verksemd, men må vere konkret til den einskilde
byggesaka. Då måtte ein heller unnta
heile eigedomen frå bygge- og deleforbodet.
Av dei arbeida som er lista opp under pkt.b vil bygge- og
deleforbodet gjelde for fylgjande:
-
opparbeiding av parkeringsplass (§ 93) (ikkje asfalteringa)
-
påbygg på 20 m2 (§ 86a)
-
påbygg på 150 m2 (§93)
I gjeldande reguleringsplan er området regulert til industri
slik at det uansett må søkast om dispensasjon frå reguleringsplan i kvar
byggesak. Det kan og gjelde andre
bestemmelser i planen.
Ein oppfattar tiltaka til å vere i samsvar med intensjonen
for planarbeidet og området slik at det er grunnlag for å gje dispensasjon frå
bygge- og deleforbodet for kvar einskild slik sak som måtte kome.
Saksvurdering og konklusjon:
I tråd med vegvesenet sin uttale vil ein ta utgangspunkt i
gangvegsystemet for utforming av planområdet.
Dette er og i samsvar med generelle statlege føringar.
Ein må avvente slutthandsaming av planen til nærare resultat
av risikovurdering for fjellskred/flodbølgje ligg føre.
Ei bygging for utviding av verksemda til Valldal Automaskin
vil i utgangspunktet ikkje vere etter intensjonane som kommunestyret har sett
for området. Her vil alternativa vere:
a.
Heile arealet blir regulert til serviceføremål og bygget går
ut av planen
b.
Det blir arbeidd vidare med ei løysing som kombinerer
verksemda til Valldal automaskin/Remseth Maskin med den utnyttinga ein elles
legg opp til for området.
I innstillinga legg ein opp til alt.a.
Dei same alternativa vil gjelde for dei to andre verksemdene
i området, Norddal el-verk og Valldal Grønt, og her bør ein ha same
reguleringsføremål for alle tre eigedomane.
Den vidare planutforminga skjer i dialog med alle aktørar
innanfor området der ein og kan take opp gjennomføring i planfasen.
Bygge- og deleforbodet blir gjennomført for heile det
kunngjorte planområdet. Ein unntar
ikkje eigedomen til Valldal Bowlingsenter frå forbodet. Søknad om dispensasjon frå Valldal
Bowlingsenter blir tatt opp i eiga sak.
