Rådmannen vert pålagt å setje ned
ei tverrfagleg arbeidsgruppe av tilsette og tillitsvalde som skal utarbeide ein
strategisk plan for rekrutteringstiltak, med vurdering av evt. økonomiske
konsekvensar.
Saksgrunnlag:
Kampen om arbeidskrafta har blitt merkbar så vel for Norddal
kommune som for resten av landet.
For å kunne lukkast med å rekruttere og halde på
arbeidskrafta, er det behov for nytenking. Plan for rekrutteringstiltak vil
vere ein nødvendig reiskap i dette arbeidet.
Saksopplysningar:
Norddal kommune har i dag vakanse i mange stillingar. Døme: Psyk. sjukepleiar, kommuneplanleggar,
fagarbeidarar, miljøterapeutar, sjukepleiarstillingar og andre stillingar i
pleie-omsorgsavdelinga. I pleie-omsorgsavdelinga vert det til tider skaffa
arbeidskraft gjennom byrå, som er ei dyr løysing - men som er nødvendig for å
avhjelpe akutte behov.
Vakanse over tid i enkelte stillingar fører til ekstra
belastningar for øvrig personale, som igjen medfører uønskte konsekvensar; døme
sjukefråver.
For å kunne yte gode tenester til innbyggarane er det viktig
at vi kan fylle stillingane med kvalifisert personell. Etablerte
personalpolitiske tiltak som har eksistert over tid er t.d, utdanningsstipend,
tilskot til etterutdanning, flyttegodtgjersle, etableringstilskot, subsidiering
av bu-utgifter. Dette har vore vurdert i høve til rekrutteringsvanskar i
enkelte stillingsgrupper.
KS har sett fokus på utfordringar som kommunesektoren vil
stå overfor dei komande åra gjennom heftet ”Stolt og unik” –
Arbeidsgjevarstrategi mot 2020. Her blir det peikt på to hovudutfordringar:
- Kommunane
si evne til nyskaping.
- Kommunane
sin tilgang på og forvaltning av eiga arbeidskraft.
Gjennom dialogmøte har Møre og Romsdal fylke sett fokus på
kva utfordringar som er knytt til det såkalla ”Kompetanseløftet 2015”.
Saksvurdering og konklusjon:
I arbeid med rekruttering av medarbeidarar til stillingar i
Norddal kommune må ein tenkje seg nye løysingar og virkemiddel. Marknadsføring
av kommunen som ein god stad å bu, tilrettelegging og ein god arbeidsgjevarpolitikk,
vil spele ei vesentleg rolle. Både intern rekruttering og kompetanseheving hos
eigne tilsette og nyrekruttering må ha fokus.
Eksisterande tilskot/stipendordningar treng ein gjennomgang,
og nye tiltak bør vurderast. Stimuleringstiltaka vil kunne medføre økonomiske
konsekvensar som evt. må takast omsyn til i budsjettsamanheng.
Rådmannen har hatt førebelse drøftingar med tillitsvalde
omkring utfordringane i arbeidsgjevarpolitikken, og det er kome fleire innspel.
Det er ønske om at det vert sett ned ei arbeidsgruppe med representantar frå
tilsette, tillitsvalde og rådgjevar
personal for utarbeiding av ein plan knytt til rekruttering av
kompetente medarbeidarar.
